Asiya İnfrastruktur İnvestisiya Bankının (AIIB) Direktorlar Şurası Azərbaycanın ilk irimiqyaslı Xəzər dənizi suyunun duzsuzlaşdırılması zavodunun yaradılması üçün 45 milyon ABŞ dolları məbləğində qeyri-suveren maliyyələşdirməni təsdiqləyib.
Bunu AIIB-nin 2-ci region üzrə dövlət sektoru müştəriləri ilə iş üzrə Baş direktoru Syaohun Yanq Trend-ə müsahibəsində deyib.
“Bu layihənin ölkənin su sektorunda ilk dövlət-özəl tərəfdaşlığı olması da gözlənilir”, - deyə Syaohun Yanq qeyd edib.
AIIB rəsmisi bildirib ki, bankın Azərbaycanla əməkdaşlığının əhatə dairəsi genişlənir və hazırda tərəfdaşlıq şəhər mobilliyi, bərpa olunan enerji, su və regional bağlantı sahələrini əhatə edir.
“Biz bütün bu istiqamətlər üzrə əhəmiyyətli imkanlar görürük. Təsdiqlənmiş Bakı Metropoliteninin birinci mərhələsi layihəsi ilə yanaşı, AIIB 820 milyon ABŞ dolları dəyərində təklif olunan Yaşıl Xəttin genişləndirilməsi layihəsini də nəzərdən keçirir. Bərpa olunan enerji sahəsində biz 200 MVt gücündə təklif olunan Abşeron-Qaradağ külək layihəsini qiymətləndiririk”, - deyə o bildirib.
Syaohun Yanq qeyd edib ki, Azərbaycanın Orta Dəhlizdəki rolu nəzərə alınmaqla nəqliyyat və logistika da əhəmiyyətli potensiala malikdir.
“Bərpa olunan enerji, enerji saxlama sistemləri və elektrik infrastrukturu ölkənin enerji keçidi və regional enerji bağlantısı məqsədlərini dəstəkləyə bilər. Su infrastrukturu uzunmüddətli su təhlükəsizliyinə və iqlim dayanıqlılığına töhfə verə bilər, dayanıqlı şəhər mobilliyi isə Bakı və digər şəhər mərkəzlərinin inkişafını dəstəkləyə bilər. Yaşıl və dayanıqlı maliyyələşdirmə də infrastruktur investisiyaları üçün mövcud kapital mənbələrinin genişləndirilməsinə kömək edə bilər”, - deyə AIIB rəsmisi əlavə edib.
Syaohun Yanq Azərbaycanın AIIB-nin təsisçi üzv ölkələrindən biri olduğunu və ölkə ilə qurulan tərəfdaşlığı yüksək qiymətləndirdiklərini bildirib.
“Mərkəzi Asiya ilə Cənubi Qafqazı, Türkiyəni və Avropa bazarlarını birləşdirən strateji mövqeyi Azərbaycana regional bağlantıların, ticarətin və enerji inteqrasiyasının inkişafında mühüm rol verir.
AIIB ilə Azərbaycan arasında 2025-ci ildə imzalanmış Birgə Bəyannamə bu tərəfdaşlığın gələcək inkişafı üçün mühüm çərçivə yaradır. Sənəd çoxillik dinamik investisiya proqramının formalaşdırılmasını nəzərdə tutur və iqlimə davamlı infrastruktur və dekarbonizasiya, yeni nəsil nəqliyyat, Azərbaycanın beynəlxalq ticarət və logistika dəhlizi kimi rolunu dəstəkləyən enerji və rəqəmsal infrastruktur, eləcə də innovativ maliyyələşdirmə və dövlət-özəl tərəfdaşlığı vasitəsilə özəl sektorun iştirakının artırılması istiqamətlərində imkanları müəyyənləşdirir”, - deyə o bildirib.
Onun sözlərinə görə, AIIB gələcəkdə Azərbaycan hökuməti ilə əməkdaşlıq edərək ölkənin milli prioritetlərinə uyğun və regional bağlantılılığa, enerji təhlükəsizliyinə və iqlim dayanıqlılığına töhfə verən çoxillik layihələr portfelinin formalaşdırılmasına çalışacaq.
“Çoxtərəfli inkişaf bankı kimi bizim rolumuz yalnız maliyyə təmin etməkdən ibarət deyil. Biz beynəlxalq təcrübə, layihələrin hazırlanması imkanları, risklərin idarə edilməsi və digər kapital mənbələrinin səfərbər edilməsi imkanlarını da təqdim edirik. Yaxşı hazırlanmış və şaxələndirilmiş investisiya proqramı vasitəsilə bu tərəfdaşlığın daha da dərinləşdirilməsi üçün əhəmiyyətli imkanlar görürük”, - o deyib.
