Xalqımızın öz karifeylərindən də fikir gətirə bilərdim. Məlum səbəblərə görə etmirəm. Mövzunun üstündə əlavə ziddiyyətlərə yol açmağa gərək yoxdur. Bu üzdən Viktor Hüqonu yada salıram. Hüqo deyirdi - "Bir məktəb tikin, bir həbsxananın sayını azaldın"...
Demək ki, məktəbin yolu həbsxana yolu deyil, olmamalıdır... Məktəbin yolu konsert, teatr, əyləncə yolu deyil, olmamalıdır... Məktəb yolu məscid, kilsə, mollaxana yolu da deyil, olmamalıdır...
Bunu "Bakı-Xəbər" Media Qrupunun rəhbəri, politoloq Aydın Quliyev öz Facebook səhifəsində yazıb.
A.Quliyev daha sonra yazır:
Məktəb yolu təhsil yoludur, müasirlik yoludur, elm, savad, maarif yoludur...
Məktəbi dindən ayırdıq. Çoxdan ayırmışıq. Ona görə ayırmadıq ki, bir-birinə qarşı çıxsınlar... Ayırdıq ki, hərəsi öz yolu ilə getsin... Ayırdıq ki, ikisi də öz yolunda inkişaf etsin… Biri elmi, texnoloji və dünyaya məntiqi baxışın ilk cığır açanı olsun... O biri daxili mənəvi paklanmanın əsasını qoysun...
İndi məktəblərimizin ətrafında görün nə baş verir, nə müzakirələr açılır?!..
Məktəblərdə təhsilin keyfiyyəti, müəllimin davranışı, səviyyəsi, təhsil metodikasının qurulması yolları, hər gələn nəzirin özü ilə bağlı bir qaydalar sistemi gətirməsi, məktəbi sınaq laboratoriyasına çevirməsi, universitet və kolleclərə qəbul qaydalarının tez-tez dəyişdirilməsi, bəzən lüzumsuz və ziyanlı şəkildə dəyişdirilməsi, pul yığılması və sair kimi neqativlərə qarşı obyektiv etiraz və narazılıqlara həmişə dəstək verib nüdafiə etmişəm. Ancaq bu kimi neqativlərə qarşı etirazlar, narazılıqlar təəssüf ki, son günlərin yenidən qaldırılmış "hicab dalğası" qədər emosional, fəal və qızğın olmayıb... İndiyə qədər bir dəfə görmədik ki, "neqativ hərəkətlərə və idarəçiliyə yol verən filan məktəbin direktoru vəzifədən dərhal uzaqlaşdırılana qədər həmin məktəbin heç bir şagirdi, ya müəllimi məktəbə getməsin" çağırışı edilsin...
Ancaq "hicab dalğası" ilə bağlı ayrı emosionallıq, ayrı fəallıq görürük....Çünki bunun heç də bütün hallarda ayrı-ayrı valideynlərin, şagirdlərin saf və qatqısız dini duyğularından, həqiqi din təəssübkeşliyindən irəli gəldiyi şübhəli görünür... Haralardansa idarə olunana çox oxşayır...
Mən konkret ünvanlar göstərmirəm. Qoy bunu uyğun orqanlar araşdırsınlar...
Biz başqa istiqamətə yönələk. Necə deyirsiniz, məktəbi buraxaq milyonlarla bir-birindən fərqli geyim zövqlərinin tüğyan etdiyi məkana çevrilsin? Biri alt paltarı ilə, biri üst paltarı ilə, biri kasıbyana, biri dəbdəbəli geyimdə gəlsin? Biri qısa ətəkdə, o biri şortikdə gəlsə, məktəb dediyimiz məkanın nəyə dönə biləcəyini təsəvvür edirsiz? Bütün bu geyim formalarında şagird və müəllimlərin məktəbə gəlişi nə qədər uyğunsuz olursa, hicabda gəlmək də o qədər uyğunsuzdur. Hicab çox gözəl, abırlı geyim formasıdır. Hər halda ona bürünmüş insan haqda ağıllara gələn ilk təəssürat bu olur - bu adam dürüst olmaq yolu seçib, dürüstdür, namaz qılıb oruc tutandır, sadəcə imankeş yox, həm də ibadətkeş müsəlmandır... Ancaq hicab hər yerdə yox, məktəbdən başqa hər yerdə gözəldir, normaldır, məktəbin missiyasına və ruhuna isə qəti uyğun deyil… Biri futbolçu və boksçu formasında məscidə girib namaz qılsa, buna necə baxarsınız?? Lütfən, bircə onu deməyin ki, normal baxılar ...Xeyr, məsciddə futbol forması gözəllik deyil...
Məktəbdə də hicab gözəllik deyil...
Məktəbin gözəlliyi müəllim və şagirdlərin hər ikisi üçün vahid geyim formasıdır... Qadınlar - qızlar üçün bir, kişilər üçün başqa dizaynda... Təsəvvür edin ki, vahid rəsmi forma geyinmiş yüzlərlə qız və oğlanın arasında bir neçə hicablı görsənir… Xüsusi metodika ilə tədris olunan hərbi, fiziki hazırlıq, əmək təlimi dərslərində necə olacaq? Bu dərslər hicab yeri deyil axı...
Baxıram, bəzi özünü çoxbilmiş kimi göstərənlər Konstitusiyanın bərabərlik, vicdan azadlığı kimi müddəalarına söykənərək "vaveyla, din əldən getdi" deyə haray salırlar...
Əvvəla, uşaqlara imkan verin ki, öncə "vicdan azadlığının" nə olduğunu anlamaq yaşına qədər böyüsün. Hələ həyatdan, dindən, islamdan xəbərsiz uşaqları hicaba, türbana büküb məktəbə göndərməyin adı nədir?! Vicdan azadlığı körpə uşaq üçün və ya kiçik yaşlı məktəbli üçün deyil.
Bəziləri sosial şəbəkələrdə dil qəfəsə qoymur. Məsələni dərhal siyasiləşdirərək "sən bu uşağı böyütməyibsən, uşaq pulu verməyibsən, kitab-dəftər almayıbsan, bəs nə ixtiyarla hicabla məktəbə buraxmırsan?!..
Allah, Allah... Bu nə yanaşmadır? Sabah belələri deyəcək ki, "sən nə haqla valideynin öz uşağını oxudub-oxutmamaq hüququna qarışırsan, uşaq mənimdir, özüm bilərəm oxusun-oxumasın, heç məktəbə də buraxmaram…" Görürsüz, məktəblərin o məşhur Molla Sadıq obrazlarının "insafında" olduğu dövrlərə geri qayıdır bəziləri...
Mən də uşaq pullarının ləyaqətli səviyyədə verilməsini və nəhayət bu çək-çevirə son qoyulmasını zəruri sayıram... Təki hicab məsələsini siyasiləşdirənlərin uşaq pulunu da bunun gözünə qatmasına fürsət qalmasın…
Ən yeni "hicab dalğasının" arxasında səbəblər görürəm.
1. Bu iş kənardan təşkil olunur, idarə edilir. İşin içində 2 bir-birindən çox fərqli dövlət və başqa bir neçə dövlətdən ibarət qrup var. Bunu da araşdırmaq dövlətimizin işidir. Cəmiyyətimiz dindarlığa meylli olsa da, hicaba bağlı insanlar olsa da, bu məlum xarici qüvvələr insanlarımızın həssas yerindən sui-istifadə edirlər...
2. İnsanları bəzən qıcıqlandıran qeyri-dini təzahür və hadisələrin qarşısı alınmalıdır... Hicabdan danışılan yerdə biri işsizlikdən, o biri idarəçilikdən, başqa biri pensiyadan və sairdən danışır. Yəni hicab mövzusunu fürsət bilənlər var... O üzdən yanakı problemlərin yaranmasına imkan verilməməlidir.
Nəhayət, məktəblərdə vahid formanın tətbiqi güzəştsiz, qətiyyətli formada davam etdirilməlidir.
Azərbaycan müsəlmanların, dindarların ölkəsidir... Ancaq İrandan, Türkiyədən, Ərəb ölkələrindən fərqli olaraq bizim dövlətimiz dinin üstündə qurulmayıb, din dövlətimizın yanında gedir... Hələ onu demirəm ki, İslamdan da, xristianlıqdan da qabaq bu yerlərdə dövlət olub...
Tahir TAĞIYEV
