Elşən Manafov: “Ölkəmiz qlobal və regional mahiyyət kəsb edən məlum hadisələrin episentrində yerləşir”
Prezident İlham Əliyev Yeni Azərbaycan Partiyasının (YAP) VIII Qurultayında çıxışı zamanı deyib ki, taktiki və strateji məqsədlər müəyyən dərəcədə dəyişsə də, ana xətt dəyişməz olaraq qalır:
“Təbii ki, illər keçdikcə taktiki və hətta strateji məqsədlər də müəyyən dərəcədə dəyişir, amma ana xətt dəyişməz olaraq qalır. Müstəqillik, dövlətçilik, iqtisadi müstəqillik, güclü hərbi potensial və öz imkanlarımızdan maksimum istifadə etmə imkanları. Yəni yığcam formada bunu təsvir etmək üçün dediyim amillər, məncə, kifayətdir. Bu siyasət 2003-cü ildən bu yana davam etdirilirdi, bu gün də davam etdirilir və bundan sonra da davam etdiriləcək”.
Sözügedən məsələni baki-xeber.com-a şərh edən politoloq Elşən Manafovun fikrincə, hazırda Azərbaycan ətrafında regional konteksdə cərəyan edən hadisələr qlobal dünya nizamının yenidən müəyyənləşdirilməsi ilə bağlı beynəlxalq güclərin geosiyasi maraqları ilə bağlıdır: “Məlum güc mərkəzləri arasında hərbi və siyasi müstəvidə güclənməkdə olan gərginlik dünyada satış bazarları, xammal mənbələri uğrunda gedən mübarizənin geosiyasi reallıqlarından irəli gəlir. Bəlli layihələrin icrası tranzit əhəmiyyətə malik dəhlizlər uğrunda qarşıdurmanı da, loqistik reallıqlar nəzərə alınmaqla fərqli müstəvi üzərinə gətirib. Azərbaycanın cənubunda İran və ABŞ, bir qədər şimal-qərbdə isə Rusiya və Ukrayna arasında gedən hərbi əməliyyatlar təkcə regional deyil, qlobal masştabda da təsir göstərir. Bütün bunlar problemlərin dərinləşməsinə səbəb olmaqla öz milli müstəqilliklərini qoruyub saxlamağa çalışan, siyasi ekspertlər tərəfindən orta güc dövlətləri sırasına aid edilən dövlətləri də təhdid edir. Onların milli təhlükəsizliklə bağlı qayğılarını artırır”.
Politoloq onu da qeyd etdi ki, məlum müharibələr regionlarda infrastrukturun, sənaye və kənd təsərrüfatı müəssisələrinin dağılmasına, dövlətlərin iqtisadi ticari əlaqələrində ciddi əhəmiyyətə malik loqistik marşrutlar üzərində təhlükənin böyüməsinə və deməli yükdaşımalarda iqtisadi rentabelliyin azalmasına, mənfəətlərin həcmimin kiçilməsinə gətirib çıxarır: “Bu isə beynəlxalq transmilli şirkətləri, maliyyə institutlarını -bankları proseslərə qatır. Onların orta güc dövlətlərinin siyasi elitaları ilə müasir dövrün qlobal çağırışlarına nəzərən yeni münasibətlər qurmağa sövq edir. Azərbaycan qlobal və regional mahiyyət kəsb edən məlum hadisələrin episentrində yerləşir. Bu mənada milli təhlükəsizliyimizlə bağlı maraqlarımız bizləri qlobal dünya nizamına təsir edən və geosiyasi məzmun daşıyan tektonik prosesləri izləməyə, qabaqlayıcı tədbirlər görmək məcburiyyəti qarşısında qoyur. Bu reallıqlardan çıxış edən prezident Prezident Əliyev qeyd edir ki, bizim bu gün iki fövqəldövlət sayılan ABŞ və Çinlə münasibətlərimizdə problemlər yoxdur. Təmsil olunduğumuz regionda nüfuz dairəsi uğrunda mübarizə aparan Rusiya, Türkiyə və İranla münasibətlərimiz də qarşılıqlı maraq və hörmət müstəvisi üzərində davam etdirilir. Azərbaycan regionda təhlükəsizliyin dayanıqlı və sabit olması üçün orta güc dövləti kimi müxtəlif maraqlara malik tərəflər ardında danışıqlarda vasitəçilik edir. Bu isə rəsmi Bakıya müxtəlif güc mərkəzləri tərəfindən olan siyasi etimadın göstəricisi kimi dövlətimizin regional, milli maraqlarının qorunmasında əhəmiyyətli faktordur. Azərbaycan özünün xarici siyasətinin prioritet istiqamətlərinə ciddi dəyişikliklər etməsə də, yuxarıda sadaladığımız amillər, habelə enerji təhlükəsizliyi sahəsində məlum tərəflərlə əməkdaşlığımızın gücləndirilməsi zərurəti beynəlxalq və regional siyasətimizə bəzi korrektlərin edilməsi zərurətini qaçılmaz edib”.
Vidadi ORDAHALLI
