İlqar Hüseynli: “Belə işlərdə maliyyə yeyintisi və saxtakarlığa yol verənlər layiqli cəzalarını almalıdırlar”
İyunun 1-də axşam saatlarından başlayaraq Göyçay, İsmayıllı, Qəbələ rayonlarına yağan güclü yağışdan sonra əmələ gələn sel suları Göyçay çayında suyun səviyyəsinin xeyli artmasına səbəb olub. Nəticədə Göyçay şəhəri, eləcə də Cəyirli, Potu, Çərəkə və başqa kəndlərin sakinləri üçün təhlükə yaranıb.
Sel suları çay yatağının genişlənməsinə səbəb olub, ətrafdakı torpaq qatını yuyaraq aparıb, əkin sahələrinə, meyvə bağlarına zərər yetirib. Sel suları Bakı-Şamaxı-Yevlax avtomobil yolunun Göyçay çayı üzərindəki piyada və avtomobil körpüsünə də ziyan vurub. İyunun 2-də, saat 13:00 radələrində selin təsiri nəticəsində çayın üzərindəki iki beton dayaqlı piyada körpüsü yararsız hala düşüb. Körpünün altındakı beton plitələri və mühafizə bəndini sel yuyaraq aparıb. "Azərbaycan Avtomobil Yolları" Dövlət Agentliyinin İctimaiyyətlə əlaqələr şöbəsinin rəisi Anar Nəcəfli bildirib ki, Göyçayda selin yararsız hala saldığı avtomobil körpüsündən 200 metr aralıda müvəqqəti yolun salınmasına başlanıb. Artıq Azərbaycanda dövlət büdcəsindən ayrılan maliyyə vəsaiti hesabına reallaşan layihələrin keyfiyyətsizliyi ilə bağlı silsilə mənzərələrlə rastlaşırıq. Bundan əvvəl böyük maliyyə vəsaiti hesabına başa gələn və istismar müddəti bir neçə onilliyə hesablanan Bakı-Quba avtomobil yolunun yararsız hala düşdüyünün şahidi olduq. “Bayraq Meydanı” kompleksindəki mənzərə də göz önündədir. Siyahını bir az da genişləndirmək olar. Təbii ki, burada dövlətin heç bir günahı yoxdur. Məlumdur ki, elə böyük maliyyə tutumlu layihələrə vəsaiti dövlət ayırır. Verilən açıqlamalardan görünür ki, layihələrin maliyyə cəhətdən heç bir çətinliyi olmayıb. Ortaya keyfiyyətsiz iş qoyulubsa, demək ki, iş icraçıları tapşırılan məsələnin öhdəsindən layiqincə gələ bilməyiblər. Təbii ki, bu cür layihələrin tikintisi hansısa kiçik tikinti şirkəti səviyyəsində həyata keçirilməyib. Bu cür məsələlərdə məsul qurum kimi böyük nazirlik və komitələr çıxış edib. Belə olan halda, dövlətin böyük pulları hesabına ərsəyə gələn və tez bir zamanda yararsız hala düşən layihələrə görə məsuliyyəti kimlər daşımalıdır?
Sosial məsələlər üzrə ekspert İlqar Hüseynli qəzetimizə açıqlamasında bildirdi ki, bu məsələlərdə məsuliyyət məsələsi mütləq müəyyənləşməlidir: “Fikir verdinizsə, körpünü inşa edən qurum bildirdi ki, bərkitmə işləri güclü aparılıb. Onlar bəyan etdilər ki, körpünün üzərində durduğu suvaylar 14 metr dərinliyə basdırılıb. Təbii fəlakətin miqyası elə güclü oldu ki, həmin suvaylar tab gətirə bilmədi. Mən isə hesab edirəm ki, həmin körpünün tikintisində ciddi nöqsanlara yol verilməsəydi, o uçmazdı. Biz körpülərə adı yol ötürücüsü kimi baxmamalıyıq. Onlara mühüm strateji obyekt olaraq qiymət verməliyik. Zərurət yarananda həmin körpüdən Azərbaycan Ordusu da istifadə etməlidir. Burada dövlətin kifayət qədər vəsaiti xərclənib. Dövlət vəsaitindən xərcləmələrin necə həyata keçirilməsi ilə bağlı ciddi araşdırmalar aparılmalıdır. Təbii fəlakətlər dünyanın hər bir yerində baş verir. Ancaq Göyçayda baş verən fəlakətin miqyası elə də böyük olmayıb ki, belə mənzərəyə haqq qazandırılsın. Orada sunami olmayıb, kiçik bir çayda suyun səviyyəsi artıb və nəticədə körpü uçub. Sadəcə, tikintini aparan qurumlar əmin olublar ki, illər uzunu müşahidə etdikləri mənzərə davam edəcək. Yəni çaydakı su əvvəlki kimi az olacaq. Risq faktorları lazımi şəkildə nəzərə alınmadığı səbəbindən belə bir mənzərə yaranıb. Qısaca onu deyə bilərəm ki, körpülərin təhlükəsizliyini təmin etmək üçün sulaylarla yanaşı, cayın ona yaxın olan sağ və sol divarları beton örtüklərlə bərkidilməli idi. Körpünün zədələnməsindən göründü ki, qurğular torpaqla yanaşı çökürdü. Hesab edirəm ki, bu və ya digər uğursuz layihələrlə bağlı araşdırmalara başlanmalıdır. Belə işlərdə maliyyə yeyintisi və saxtakarlığa yol verənlər layiqli cəzalarını almalıdırlar”.
Məhəmmədəli QƏRİBLİ
