Nadir İsrafilov: "... təhsil ictimaiyyətini narahat etməlidir"
Azərbaycanın ali məktəblərinə və tam orta təhsil bazasında orta ixtisas təhsil müəssisələrinə yayda keçiriləcək qəbul imtahanlarında iştirak etmək istəyən abituriyentlərin qeydiyyatı başa çatıb. Açıqlanan statistik rəqəmlərə əsasən, bəzi ixtisas qrupları üzrə sənəd verən abituriyentlərin sayı azalıb. Dövlət İmtahan Mərkəzinin yaydığı məlumatda qeyd olunur ki, Azərbaycanda bu il I-IV ixtisas qrupları və tam orta təhsil bazasında orta ixtisas təhsili müəssisələrinə 90616 abituriyent sənəd verib.
Dövlət İmtahan Mərkəzinin (DİM) sektor müdiri Xanlar Xanlarzadənin media nümayəndələrinə verdiyi məlumata görə, bu il I-IV ixtisas qrupları və tam orta təhsil bazasında orta ixtisas təhsili müəssisələrinə sənəd verən abituriyentlərin sayında ötən ilə nisbətən azalma qeydə alınıb. Azalmanın əsas səbəblərindən biri builki 11-ci sinif məzunlarının sayının ötən ilə nisbətən təqribən 3000 nəfər az olmasıdır. Belə ki, ötən il 11-ci sinif məzunlarının sayı 87 min nəfərdən çox olduğu halda, bu il onların sayı 84 min nəfərdən çox olacaq: "Təbii ki, bu da sənəd verənlərin sayına təsir göstərib. Amma ümumilikdə isə bu il sənəd verənlərin sayını təqribən ötənilki hədd daxilində hesab etmək olar. Bu il ümumilikdə ali məktəblərə I-IV ixtisas qrupları üzrə 73676 nəfər sənəd verib. Onların 29359 nəfəri I, 20453 nəfəri II, 18739 nəfəri III, 5125 nəfəri isə IV ixtisas qrupuna ərizə verib".
Təhsil eksperti Nadir İsrafilov hesab edir ki, son illər ali məktəbə sənəd verən məzunların sayının azalmasının müxtəlif səbəbləri var: "Düzdür, məzunların sayının azalmasına təhsilin keyfiyyəti də öz təsirini göstərir. Amma etiraf edək ki, keyfiyyət məsələsi məzunların sayının bu qədər azalmasına səbəb ola bilməz. Hesab edirəm ki, burada nəsillərin say fərqi də rol oynayır. Məsələn, sovet dövründə nəsillərin say artımına ciddi şəkildə fikir verilməklə yanaşı, dövlət tərəfindən həmin ailələr üçün yardımlar ayrılırdı. İndi belə güzəştlər edilmir. Ona görə də hazırda iki uşaqdan artıq ailələrə çox nadir hallarda rast gəlmək mümkündür. Sovet dövründə isə ailələrdəki uşaqların sayı ən azından 4-5 nəfər olurdu. Bu, dövlətin yeritdiyi siyasətin tərkib hissəsi idi. Aparılan siyasət nəticəsində gənc və yeniyetmə nəsil kifayət qədər üstünlük təşkil edirdi. Bu da məzunların sayına təsir göstərirdi".
Həmsöhbətimizin fikrincə, ali məktəbə sənəd verən abituriyentlərin sayının azalması təhsil ictimaiyyətini narahat etməlidir: "Axı indiki şəraitdə bizim gənclər niyə oxumağa maraq göstərməsin? Biz inkişaf etmiş ölkələrlə rəqabət aparmağa iddialıyıqsa, deməli, cəmiyyətdə savadlı insanların çəkisini artırmalıyıq".
Günel CƏLİLOVA
