Paytaxtımızda və yerlərdə polisin təşkilatçılığı ilə keçirilən narkomaniya ilə mübarizəyə həsr olunmuş maarifləndirici tədbirlərdə dilə gətirilən narahatlıq başadüşüləndir. Çünki həlli vacib məsələlərin sonucunda gəncliyimizin və gələcəyimizin taleyi dayanır.
Onları insanın qanını, canını deyil, həm də psixologiyasını, mənəviyyatını məhv edən, özündən ömürlük asılı vəziyyətə salan düşməndən qorumaq üçün sözün əsl mənasında birləşməyimiz çox vacibdir. Bu təkcə daxili işlər orqanlarına DİN rəhbərliyinin tələbi kimi anlaşılmamalıdır, bu həm də qapımızı döyən bəlanın, səssiz ölümün doğmalarımızı, əzizlərimizi bizdən qoparacaq qədər güclü olmasını görüb həyacan təbili çalan, şəxsiyyətin deqradasiyaya uğradığının fərqində olan insanların istəyidir, tələbidir. Daha dəqiq desək, bu, cəmiyyətin öz tələbidir.
Narkotik vasitələrə və narkomaniyaya gedən yol haradan başlanır? Bu suala hər kəs fərqli cavab verə bilər. İlk ağlımıza gələn, əlbəttə ki, siqaretdir. Yəni biz bütün işlərimizi buraxıb bir nömrəli problem kimi siqaretləmi mübarizə aparacağıq? Tütün və tütün məhsullarını boykotmu etməliyik? Əlbəttə, bu düşüncə ilə yanaşmanın özü də insanlarda aqressiya doğura bilər və söhbət gələcəyimiz olan gənclikdən gedirsə, o zaman düşünüb-daşınıb yollar axtarmalıyıq. Bu yolların da ən asanı hamının keçə biləcəyi maarifləndirmədir.
Belə bir deyim var: "İnsanlar arasında nəyisə yaxşılığa doğru dəyişmək istəyirsənsə və bunu arzulayırsansa, özün yaxşı nümunə olmalısan." Təəssüflər olsun ki, bəzi hallarda nümunə olmağı bacarmırıq. Elə biz özümüz də gəncliyimizi çəkindirmək istədiyimiz bəladan, yəni siqaretdən asılıyıq. Bəla təkcə siqaretdimi? Xeyr, siqaret deyil, amma bəlaları doğuracaq səbəblər çoxdur...
Məni narahat edən bir çox suallara iştirak etdiyim tədbirlərdə cavab tapıram. Bəs, görəsən o tədbirlərdə iştirak edən şagirdlər, tələbələr necə? Yarım saat, bir saat oturduğu tədbirdən həyatını dəyişdirə biləcək bir söz, bir fikir yadında saxlaya bildimi, yadında saxladıqları onu pis vərdişlərdən çəkindirə biləcəkmi? Narkomaniya və zərərli vərdişlərlə mübarizəyə qarşı keçirilən maarifləndirmə tədbirlərində həmişə bir nüans diqqətimi çəkib: bu tədbirlərdə yalnız polis əməkdaşları, narkoloq həkimlər iştirak edir.
Bir neçə gün bundan öncə Xətai Rayon Polis İdarəsinin təşilatçılığı ilə 48 nömrəli məktəbdə gerçəkləşən tədbirdə diqqətimi çəkən bir başqa məqam isə bu yazının yazılmasına təkan verdi. Tədbirdə polislərlə, həkimlərlə yanaşı, təqaüddə olan filologiya elmləri doktoru, professor İmadəddin Zəkiyev də iştirak edirdi. Ona söz veriləndə hiss etdim ki, ömrünü layiqli vətəndaş yetişdirməyə həsr etmiş, vətənini, xalqını sevən aydınımızın sözünün sehrinə düşəcəyik. Elə düşündüyüm kimi də oldu. Zala göz gəzdirəndə şagirdlərin onu necə heyranlıqla dinlədiklərini gördüm...
Hörmətli ziyalımızn fikirlərini sizinlə bölüşmək istəyirəm: "Ölkəmizin yaratdığı bu şəraiti qiymətləndirib layiqli vətəndaş olun. Kitabxananızı zənginləşdirin ki, kitablar da sizi zənginləşdirsin. Kim kitabın yanından yan keçərsə, öz səadətinin yanından yan keçər. Kitabla dost olmaq lazımdır. Kitab bilik mənbəyi olmaqla yanaşı, bizi arzularımıza doğru aparan ən gözəl və təhlükəsiz vasitədir. Kitab oxumaqla biz həm zəngin mütaliəyə malik oluruq, leksikonumuzdakı sözlərin sayı çoxalır, həm də nitqimiz inkişaf edir."
O, həmçinin, keçirilən tədbirin əhəmiyyətindən də bəhs etdi. Dedi ki, polisin təşkilatçılığı ilə belə tədbirlərin məktəblərdə, əmək kollektivlərində keçirilməsi ondan xəbər verir ki, gəncliyimiz və gələcəyimiz böyük bir bəla ilə, səssiz ölümlə, görünməz düşmənlə üzbəüzdür. Əgər birgəlik nümayiş etdirsək, hər bir çətinliyin öhdəsindən layiqincə gələ bilərik.
Düzü, hörmətli ziyalımızın çıxışından sonra düşündüm ki, elə bu tədbirdə Xətai RPİ-nin rəhbərliyi gözəl bir ənənənin əsasını qoyub. Yaxşı olardı ki, keçirilən tədbirlərdə digər ali təhsil müəssisələrinin təqaüddə olan müəllimləri də iştirak etsin, daha doğrusu, həmkarlarımız onları dəvət etməkdə maraqlı olsunlar. Bu yolla biz üz tutduğumuz gənc nəslə kitabı sevdirəcəyik...
İndi kitab oxuyan varmı? Əfsuslar olsun ki, çox azdır. Niyə? "Niyəsini" çevrəmizə baxsaq, görəcəyik. Müasir texnologiyalar, xüsusən də kompyuterlər gənclərin kitab oxuma vərdişlərinə yiyələnməsinin önünə sədd çəkir. Biz yeniliyə qarşı deyilik. Lakin o yenilik sənin dəyərlərinin, milli kimliyinin məhvinə yönəlibsə, ondan imtina etməlisən.
Narkomaniya kimi sosial şəbəkələr də qarşısıalınmaz bəlaya çevrilib. İnsan psixologiyasını asanlıqla məhv edən oyunlar, proqramlar gənclər arasında intihar hallarına belə gətirib çıxarır və biz bunun bariz nümunələrinin şahidiyik...
Bəli, fərdlərin heç də hamısında özünə nəzarət mexanizmi yoxdur. Yəni təsir altına tez düşə biləcək insanların sayı gündən-günə çoxalır. Onları kənar təsirlərdən qorumağın yollarını aramamaq, bu istiqamətdə bir tədbir görməmək və "artıq gecdir" demək isə məğlubiyyətlə barışmaqdır.
Qüdrətli orduya, güclü dövlətə sahib olmağımız üçün illər öncə səngərlərdə torpaqlarımızı qoruduğu kimi, bu gün Azərbaycan Polisi körpələrimizi, fidan balalarımızı, gəncliyimizi qorumaq naminə qətiyyətini, iradəsini, vaxtını səfərbər, sinəsini narkotacirlərin gülləsinə sipər edib içdiyi andına sadiq qalır.
Bilirik ki, narkomaniyaya düçar olmuş şəxs həm də potensial cinayətkardır. Unutmaq olmaz ki, narkotik vasitələri ölkəmizə qaçaq yolla gətirənlərin, dövlətimizin güclənməsini, iqtisadiyyatımızın inkişafını, gəncliyimizin uğurlarını gözü götürməyən qüvvələrin də əsas istəyi ölkəmizdəki əminamanlığı pozmaq, bu sabitlik adasını sarsıtmaq, bizi gələcək hədəflərimizdən yayındırmaqdır.
Hafiz Təmirov polis mayoru
