Bahadur Bilalov: "Azərbaycanda bayram şənlikləri təntənəli şəkildə keçirilir, bu da əcnəbilərin marağına səbəb olur"
Bir çox ölkədə ictimai-siyasi gərginliklərin əksinə, Azərbaycanda hökm sürən sabitlik turistləri ölkəmizə cəlb edir. Dəniz və tarixi məkanlarla yanaşı, isti yay aylarında sərinlik axtaran turistlər də ölkəmizə axın edir. Açıqlanan statistikaya və paytaxt əhlinin müşahidələrinə görə, ötən il ölkəmizə daha çox ərəb turistləri təşrif buyurub. Onlar Bakıda - İçərişəhər, Qobustan, Atəşgah, Abşeron qalalarını gəzir, Quba-Xaçmaz və Qəbələ-Şəki bölgələrində dincəlməyə üstünlük verirlər.
Azərbaycana istirahət üçün gələn əcnəbi turistlər deyir ki, onlar zəngin təbii ehtiyatları, tarixi, mədəniyyəti, ənənələri və son dərəcə qonaqpərvər xalqı olan bu ölkəni dünya turizminin yeni mirvarisi kimi kəşf edib.
Aparılan araşdırmalara əsasən, ölkəmizə turistlər əsasən qrup şəklində gəlir. Yəni qrup formatında gələn turistlər çoxdur. Qrup deyəndə öz ailəsi və ya dost-tanışı ilə birgə səyahətə gedənlər nəzərdə tutulur.
Ölkəmizə gələn turistlərin sayının artdığını ölkə başçısı İlham Əliyev də təsdiqləyib. Prezident Nazirlər Kabinetinin 2017-ci ilin birinci rübünün sosial-iqtisadi inkişafının yekunlarına və qarşıda duran vəzifələrə həsr olunan iclasında çıxış edərək bildirib ki, bu ilin ilk 3 ayında ölkəyə gələn turistlərin sayında 25 % artım qeydə alınıb: "Bu, Azərbaycanda mövcud olan sabitlik, yaradılan infrastruktur, ölkəmizdəki 6 hava limanı, gözəl yollar, otellərin inşası ilə əlaqədardır. Üç ay ərzində "Asan viza" xətti ilə 40 min viza verilib, 80-dən çox ölkənin vətəndaşları elektron vizalar alır. Bu gün Bakı dünyanın ən gözəl şəhərlərindən biridir. Gələn ay ölkəmizdə dördüncü İslam Həmrəyliyi Oyunları keçiriləcək. Bu, böyük idman bayramı olacaq".
Mövzu ilə əlaqədar ekspertə müraciət etdik. Turizm sahəsi üzrə ekspert Bahadur Bilalov bizimlə söhbətində qeyd etdi ki, xarici turistlərin Azərbaycana marağı günü-gündən artır.
Onun sözlərinə görə, Azərbaycan Turizm Menecment və Avstriyanın Krems Universiteti arasında Azərbaycan-Avstriya Turizm Proqramı keçirilir: "O proqramın 10 illiyi ilə bağlı Turizm Universitetində bu günlərdə tədbir keçirildi. Həmin tədbirdə iştirak edən mədəniyyət və turizm naziri Əbülfəs Qarayev çıxışında bildirib ki, ilin ilk üç ayı ərzində ölkəyə gələn xarici turistlərin sayı təxminən 500 min nəfər olub". Turistlərin sayının artması səbəbinə gəlincə, ekspert bildirdi ki, Azərbaycanda bayram şənlikləri təntənəli şəkildə keçirilir. Novruz bayramı bu il fərqli ssenari ilə keçirildi: "Bu bayrama görə Azərbaycanın heç bir otelində boş yer yox idi. Bəllidir ki, ötən il ölkəmizə ərəb ölkələrindən çoxlu turist gəlmişdi. Və həmin turistlərə ölkəmizdə göstərilən yüksək xidməti və müşahidə etdiklərini geri qayıdanda öz ölkələrində yaşayan yaxınlarına çatdırdılar. Bir növ, ərəblər Azərbaycan turizm potensialının reklamçısına çevrilib. Sevindirici haldır ki, ilin əvvəlindən etibarən ölkəmizə gələn turistlərin sayında artım var. Ötən ilin müvafiq dövrünə nisbətən turistlərin sayında 215 faiz artım var".
B.Bilalovun fikrincə, bu ilin sonuna kimi 3 milyon turistin qəbulu gözlənir.
Günel CƏLİLOVA
