Azərbaycan Tibb Universitetinin (ATU) Tədris Cərrahiyyə Klinikasında Azərbaycan-Türkiyə 3-cü Beynəlxalq Bariatrik-Metobolik cərrahiyyə konqresi keçirilib.
ATU-nun elmi işlər üzrə prorektoru Rauf Bəylərov tədbirdə çıxış edərək bildirib ki, müasir dövrün mürəkkəb tibbi və sosial problemlərindən biri olan piylənmə və onun daha ağır növü - morbid, yəni xəstəlik səviyyəsinə çatmış piylənmə bir çox müəlliflər tərəfindən XXI əsrin "sakit" epidemiyası kimi qiymətləndirilir.
Prorektor bildirib ki, qidanın kaloriliyinin artması, fast-fud mədəniyyətinin yayılması, həyat tərzinin daha az hərəkətli olması insanlar, o cümlədən uşaqlar arasında bədən çəki indeksinin artmasına səbəb olur. Onun sözlərinə görə, diabet, arterial hipertenziya, qara ciyərin yağlanması, hormonal pozulmalar piylənmə ilə bilavasitə əlaqəli vəziyyətlərdir. Son 10-20 il ərzində piylənmənin müalicə üsulları arasında cərrahi yanaşma xüsusi yer alıb: "Həm sağlamlıq, həm də gözəllik nöqteyi-nəzərindən effekt verən, insanların həyatını sözün əsl mənasında dəyişdirən cərrahi bariatrik və metabolik əməliyyatlar artıq Azərbaycanda da uğurla həyata keçirilir. Bu əməliyyatların bir qismi Azərbaycan Tibb Universitetinin klinikasında aparılır. Bu səbəbdən Bariatrik toplantının universitetimizdə təşkil olunması bizim üçün xüsusi əhəmiyyətlidir. Konfransımızda qardaş Türkiyə və dost Yunanıstandan gəlmiş hmkarkarımızı salamlayıram, onlara "xoş gəldiniz" deyirəm. Türkiyə Obezite Cərrahlığı Dərnəyinin sədri, professor Murat Taşkına və Heraklion Universitetinin professoru Jon Melissasa bu tədbirə dəstək verdiklərinə görə xüsusi təşəkkür edirəm".
Prorektor R.Bəylərov, həmçinin, ATU-nun rektoru, professor Gəray Gəraybəylinin toplantı iştirakçılarına salamını çatdırıb.
ATU-nun Tədris Cərrahiyyə Klinikasının direktoru, professor Surxay Hadıyev tədbir iştirakçılarını salamlayaraq bildirib ki, rəhbərlik etdiyi klinika 4 il bundan qabaq ölkə Prezidenti İlham Əliyevin töhfəsi ilə yaradılıb: "Bizdə belə konqreslər mütəmadi olaraq keçirilir. Bugünkü tədbirimiz də çox önəmlidir. Çox maraqlı mühazirələr dinlənəcək".
Türkiyənin Bariatrik Cərrahiyyə Assosiasiyasının sədri, professor Mustafa Taşkın artıq 3-cü dəfədir Azərbaycana səfər etdiyini bildirib: "Bizim bir-birimizdən fərqimiz yoxdu, əkizlər kimiyik. Qarşılıqlı sevgimizi hiss edirik. Bu konfrans çox önəmlidir və özündə bir çox istiqamətləri birləşdirir".
Milli Məclisin deputatı İlham Məmmədov həm millət vəkili, həm də həkim kimi konqresdə iştirakına görə çox şad olduğunu bildirib: "Azərbaycan səhiyyəsində, elmində bunu bir töhfə olacaq bir konqres kimi qiymətləndirirəm. İndi piylənmə hədsiz yayılıb və bu xəstəliyin yaranma səbəbləri genişdir. Buna ətraf mühit faktoru da böyük təsir edir. Bu gün belə konqreslərin keçirilməsi gələcək nəsil üçün çox önəmlidir. Hər birinizə uğurlar diləyirəm".
Azərbaycan Bariatrik və Metabolik Cərrahlar Dərnəyinin sədri, tibb üzrə fəlsəfə doktoru Tariyel Ömərov da konfransın işini yüksək qiymətləndirərək iştirakçılara uğurlar diləyib.
Daha sonra konqres öz işinə mühazirələrlə davam edib.
Baki-xeber.com
