Onu Xətai Rayon Polis İdarəsi tərəfindən keçirilən narkomaniya ilə mübarizəyə həsr olunmuş tədbirlərin birində tanıdım. Hələ yaşı da, boyu da çox balacadır. Ən çox diqqətimi çəkən bu balaca dostumuzun bizə yaxınlaşıb çəkdiyi rəsm əsərini təqdim etməsi oldu. Düzü, bunu gözləmirdik...
Tədbirdən sonra məktəbin foyesində şagirdlərin narkomaniya ilə mübarizəyə həsr olunmuş rəsmlərinə baxdıq. Balaca dostumuzun da rəsm əsərləri onların içində yer alırdı. Yaşıdlarından fərqli olaraq, polisdən qorxmayan, onu əzizi, doğması kimi özünə məhrəm bilən, dünyanı necə görmək istədiyini fırçasının sehri və rənglərin dili ilə çəkib göstərən Məmmədzahir Məmmədov 27 nömrəli məktəbin birinci sinif şagirdidir.
Və belə qərara gəldik ki, burada rəsm çəkmək bacarığı olan uşaqlar arasında kiçik bir yarışma təşkil edək. Təklifimiz məktəb rəhbərliyinin də ürəyincə oldu.
Rəsm əsərlərinə baxış keçirəndə gözümüzü tutan şəkillərin içindən bir neçəsini seçdik. Sən demə, seçilənlərin içində balaca dostumuz Məmmədzahirin də şəkilləri varmış.
Düzü, onun istedadı bizi valeh etmişdi. Balaca rəssamı sevindirmək üçün çəkdiyi şəkilləri çərçivəyə saldıq, görüşüb ona təqdim etdik. Sevindiyindən uçmağa qanadı yox idi...
İnanırıq ki, polislərin bu sürprizi balaca rəssamın yaddaşından silinməyəcək və böyüyüb tanınmış, istedadlı rəssam olanda qəhrəman Azərbaycan Polisinin tarixə və xatirəyə çevrilən obrazına kətan üstündə ölməzlik bəxş edəcək.
Hafiz Təmirov, polis mayoru
