Vaqif Qarayev: "Bu diaqnoz tibbin bugünkü prinsiplərinə uyğun gəlmir"
Hər bir ərazidə yaşayan insanların sağlamlığına sahə həkimləri nəzarət edir. Səhhətində problem hiss edən şəxs ilk olaraq sahə həkiminə müraciət edir. Uşaqları ilk olaraq əsasən sahə həkimləri müayinə edir. Onlar uşağı müayinə edəndən sonra onun səhhətində yaranan problemin nə ilə bağlı olduğu haqqında diaqnoz qoyur.
Bu günlərdə sahə həkimlərinin uşaqlara qoyduqları diaqnozla bağlı narahatlıq hiss olunur. Səhiyyə Nazirliyinin baş neonatoloqu, Neonatoloji xidmətin təkmilləşdirilməsi üzrə xüsusi komissiyanın sədri Rüstəm Hüseynov mediaya açıqlamasında bildirib ki, sahə həkimlərinin diaqnozu eyni olur, onlar uşağa baxdıqları an eyni "xəstəlikləri" müəyyən edir. O qeyd edib ki, indiyə kimi poliklinikalarda sahə həkimləri tərəfindən körpələrdə "timus vəzinin olması" ilə bağlı diaqnoz qoyulması davamlı hal alıb.
Bu mövzunun Azərbaycanda həkimlər arasında nəsildən-nəslə ötürüldüyünü deyən R.Hüseynov qeyd edib ki, ötən əsrin 60-cı illərində "timus vəzi" mövzusu ətrafında çoxlu müzakirələr aparılıb: "Çox təəssüf ki, biz indi də belə hallara rast gəlirik. Timus adi vəzdir və bütün uşaqlarda olmalıdır. Kimdəsə bir az böyük, ayrı-ayrı ölçülərdə olur. Müəyyən müddətdən sonra öz funksiyasını itirir və sorulmağa başlayır. Onunla bağlı nə müalicə, nə də başqa tədbirlərə ehtiyac yoxdur".
Baş neonatoloq R.Hüseynovun fikirlərinə münasibət bildirən pediatr Vaqif Qarayev "Bakı-Xəbər"ə açıqlamasında qeyd etdi ki, əksər sahə həkimləri tərəfindən uşaqlara "timus vəzi" diaqnozu qoyulur: "Bunun geniş hal aldığını deməzdim. Ancaq etiraf etmək lazımdır ki, bəzi sahə həkimləri uşaqlara adıçəkilən diaqnozu qoyur. Bu diaqnoz tibbin bugünkü prinsiplərinə uyğun gəlmir. Lap bu diaqnoz qoyulsa belə, müalicəsi yoxdur axı. Yəni bu, köhnəlmiş, heç bir əhəmiyyəti olmayan diaqnozdur. Timus vəzi böyüyə bilər. Uşaq böyüdükcə, həmin vəz özü-özünə sovrulacaq. Böyümüş timus vəzi uşağın səhhətinə heç bir təhlükə törətmir".
Həmsöhbətimiz onu da bildirdi ki, "Timoma" deyilən bir ciddi problem var. Onun sözlərinə görə, əslində, müayinə məhz bu istiqamətdə aparılmalıdır. Sahə həkimi bundan şübhələnirsə, uşağı mütləq onkoloqa yönləndirməlidir.
Günel CƏLİLOVA
