Eyyub Hüseynov: "Bu gün ölkəyə qaçaqmal yolu ilə gətirilən dərman preparatları var"
Adil Qeybulla: "Qeydiyyatdan keçməyən dərmanlar müəyyən firmalar tərəfindən gətirilir və sərbəst şəkildə aptekə verilir"
Xəbər verildiyi kimi, Səhiyyə Nazirliyi tərəfindən apteklərə və əczaçılıq müəssisələrinin rəhbərlərinə ciddi xəbərdarlıq edilib. Nazirliyin yaydığı məlumata əsasən, müvafiq keyfiyyət sertifikatı olmayan, dövlət qeydiyyatından keçməyən dərman vasitələrinin satışı və istifadə halları son zamanlar geniş yayılıb.
Səhiyyə Nazirliyinin Analitik Ekspertiza Mərkəzinin şöbə müdirinin müavini Pərviz Əzizbəyov media nümayəndələrinə açıqlamasında qeyd edib ki, dərmanların dövlət qeydiyyatına alındığını göstərən müəyyən məqamlar var və vətəndaşlar buna xüsusi fikir verməlidir.
Maraqlıdır, keyfiyyət sertifikatı olmayan və dövlət qeydiyyatından keçməyən dərman vasitələri necə olur ki, apteklərdə satışa çıxarılır?
Azad İstehlakçılar Birliyinin rəhbəri Eyyub Hüseynov "Bakı-Xəbər"ə açıqlamasında qeyd etdi ki, Birlik tərəfindən bir ay öncə Daxili İşlər Nazirliyinə, Gömrük Komitəsinə və Səhiyyə Nazirliyinə rəsmi şəkildə məktub göndərilib: "Qeydiyyatdan keçməyən, qaçaqmal yolu ilə gətirilən dərmanların satıldığı apteklər şəbəkəsi barəsində aidiyyəti qurumlara məlumat verdik. Həmin dərmanların kimlər tərəfindən gətirildiyi və gizli depo barəsində məlumat verdik. Və hər bir kömək göstərməyə hazır olduğumuzu bəyan etdik. Effektli cavab Daxili İşlər Nazirliyindən gəldi. Məlum oldu ki, qaçaqmal yolu ilə dərman gətirən şəxslərdən biri həbs olunub".
Həmsöhbətimiz əminliklə dilə gətirdi ki, bu gün ölkəyə qaçaqmal yolu ilə gətirilən dərman preparatları var. Bu işlə bəzi şəxslər məşğul olur: "Həmin dərmanlar insanların səhhətinə olduqca pis təsir edir. Qeydiyyatdan keçməyən preparatların tərkibində psixotrop maddələr var".
Professor, tibbi ekspert Adil Qeybulla bildirdi ki, mənşəyi, istehsal yeri müəmmalı olan dərmanların təsirinə və təhlükəsizliyinə inam yoxdur: "Apteklərdə keyfiyyət sertifikatı olmayan dərman preparatları mövcuddur. Həmin dərmanlar müəyyən firmalar tərəfindən gətirilir və sərbəst şəkildə aptekə verilir. O dərmanların tərkibi araşdırılmadığı üçün, xoşagəlməz hallar yaşanır. Dərman zəhərlənməsi məhz bu amillə bağlıdır".
Günel CƏLİLOVA
