Ölkəmizdə narkomaniya ilə mübarizə tədbirləri gücləndikcə narkotacirlər çirkin niyyətlərini həyata keçirmək üçün müxtəlif yollara əl atır, ən çox da gələcəyimiz olan uşaqları, yeniyetmələri bu bəlaya düçar etməkdən ötrü dəridən-qabıqdan çıxırlar.
Onların qarşısını almaq üçün, bir çox dövlət strukturları ilə yanaşı, hüquq-mühafizə orqanlarının, xüsusilə də polisin bu istiqamətdə həyata keçirdiyi maarifləndirmə tədbirləri istimaiyyət tərəfindən bəyənilir və təqdir olunur. Çünki keçirilən tədbirlərdə şagirdlərlə, yeniyetmələrlə yanaşı onların valideynlərinin iştirakı hədəfə çatmağa kömək edir. Yəni məqsəd ailədə pis vərdişlərə, narkomaniyaya düçar olanların elə valideynlər tərəfindən vaxtında aşkar olunmasına kömək etməkdir. Ailə, məktəb və polis vəhdəti təkcə "ağ ölüm"lə mübarizədə deyil, şagirdlərin, yeniyetmələrin sağlam, savadlı, vətənpərvər böyüməsinə də təkan verəcək.
Xətai Rayon Polis İdarəsi tərəfindən narkomaniya ilə mübarizəyə həsr olunmuş növbəti maarifləndirmə tədbiri bu dəfə 260 nömrəli məktəbdə keçirildi. Məktəbin direktoru Qiyas Quliyev son illər ölkəmizdə narkomaniya ilə mübarizədə polisin fəaliyyətini və xidməti vəzifəsini yerinə yetirərkən qanun keşikçilərinin həlak olması faktlarını da iştirakçıların diqqətinə çatdırdı. Bildirdi ki, dərsə davamiyyəti zəif və çətin tərbiyə olunan şagirdlərin nizam-intizama dəvət edilməsində polisin rolu çox böyükdür. Məhz onların səyi nəticəsində valideynlərlə aparılan profilaktik söhbətlərdən sonra mühüm dönüş yaranıb.
Polis polkovniki Muradəli Babayev tədbirin aprel döyüşlərinin növbəti ildönümü ərəfəsində keçirilməsinə diqqət çəkərək bildirdi ki, bu gün vətənini, xalqını sevən hər bir kəsin əsas məqsədi vətənimiz uğrunda qanını-canını fəda edən, onun sərhədlərinin, hər qarış torpağının toxunulmazlığı üçün qəhrəman övladlarımızın davamçılarını yetişdirməkdir.
Sonra onun təklifi ilə aprel döyüşlərində həlak olmuş şəhid oğullarımızın əziz xatirəsi bir dəqiqəlik sükutla yad olundu.
Bildirildi ki, günü-gündən qarışan dünyamızda ölkəmizdəki sabitliyi gözü götürməyənlər gənclərimizi narkomaniya adlı bəlaya düçar etməklə burada kriminogen durumu kəskinləşdirməyə, sabitliyi pozmağa, cinayətkar əməllərin çoxalmasına çalışır. Lakin onlar heç də həmişə istəklərinə çata bilmirlər, çünki qarşılarında torpağını, millətini, gəncliyini və gələcəyini sevən Azərbaycan Polisini görürlər.
"Narkomaniya heç zaman sağalmayan bir xəsətəlikdir. O, insanda fiziki və psixoloji asılılıq yaratmaqla onu dəyərlər sistemindən məhrum edir. Narkomanlar potensial cinayətkarlar və ən qorxulu infeksion xəsətəlik daşıyıcılarıdır." Bu fikirləri Respublika Narkoloji Mərkəzinin şöbə müdiri Afət Məmmədova söylədi və şagirdləri zərərli vərdişlərdən, narkotik vasitələrdən uzaq olmağa, polis və digər aidiyyəti qurumlarla birgə aparılan maarifləndirmə tədbirlərində yaxından iştirak etməyə çağırdı.
Tədbirdə narkomaniya ilə yanaşı bu gün cəmiyyətimizi narahat edən daha bir problemə toxunuldu. İdarənin DYPŞ-nin inspektoru, polis kapitanı Fərid Əhmədov son zamanlar çoxalan yol-nəqliyyat hadisələrinə diqqət çəkərək bildirdi ki, şagirdlər yolu keçərkən təyin olunmuş yerlərdən, piyada zolaqlarından və yeraltı, yerüstü keçidlərdən istifadə etsinlər.
Daha sonra tədbirdə digər çıxış edənlər - şəxsi heyətlə iş üzrə rəis köməkçisi, polis polkovnik-leytenantı İdris Məhərrəmov, RPİ Vetaranlar Şurasının sədri Nazim Xıdırov və 35-ci PB-nin YYÇ işləri üzrə inspektoru, polis kapitanı Günel Həsənova şagirdlərə sağlam həyat tərzi sürməyi, idmanla məşğul olmağı, ən ümdəsi - ölkəmizə gənclər üçün yaradılan şəraitdən yararlanmağı tövsiyə etdilər.
Hafiz Təmirov, polis mayoru
