Osman Gündüz: "Aidiyyəti qurumların özləri qanunsuz kabel yayımına qarşı nəzarət mexanizmi tətbiq etməlidir"
"Çoxmərtəbəli binaların əksəriyyətində qanunsuz kabel yayımı ilə məşğul olan şəxslər var". Bunu Milli Məclisin Mədəniyyət komitəsinin iclasında "Kabel şəbəkəsi yayımı haqqında" qanun layihəsinin müzakirəsi zamanı Milli Televiziya və Radio Şurasının sədri Nuşirəvan Məhərrəmli bildirib.
O qeyd edib ki, belə hal xeyli saydadır: "Dəfələrlə bu məsələni qaldırmışıq. "Kabel şəbəkəsi yayımı" haqqında yeni hazırlanan qanun layihəsi əsasında buna qarşı mübarizə aparmaq istəyirik. Bununla bağlı hüquq-mühafizə orqanlarına, Vergilər Nazirliyinə müraciət etmişik, amma nəticə yoxdur. Bizim də ayrı-ayrılıqda hər bir evə girmək səlahiyyətimiz yoxdur. Amma bu qurumlar bu işin öhdəsindən gələ bilər".
Bəzi çoxmərtəbəli binalarda qanunsuz kabel yayımı ilə məşğul olanlara qarşı necə mübarizə aparılacaq?
Məsələ ilə əlaqədar mütəxəssisə müraciət etdik. İKT sahəsi üzrə mütəxəssis Osman Gündüz "Bakı-Xəbər"ə açıqlamasında qeyd etdi ki, kabel çəkilişi üçün mövcud infrastrukturdan istifadə olunur. Mövcud infrastruktur da iki qurumun əlindədir. Nəqliyyat, Rabitə və Yüksək Texnologiyalar Nazirliyi, habelə Milli Televiziya və Radio Şurası: "Kabel yayımına bu qurumlar nəzarət edir. Bu qurumlardan xəbərsiz kabel kanal sistemindən yeraltı və yerüstü istifadə olunubsa, bura nəzarət zəif olub. Hesab edirəm ki, aidiyyəti qurumların özləri qanunsuz kabel yayımına qarşı nəzarət mexanizmi tətbiq etməlidir. Dövlət qurumları öz aralarında müəyyən prosedur qurmalıdır ki, hansısa kabel operatoru kabel sisteminə daxil olsun".
Həmsöhbətimizin sözlərinə görə, aidiyyəti qurumlarda kabel televiziyasının operatorlarının hansı kanalları yayması ilə bağlı siyahı var.
Günel CƏLİLOVA
