"Məşədi Dadaş" məscidinin axundu Hacı Şahin Həsənli: "Qafqaz Müsəlmanları İdarəsi əməkdaşlarına təlimat verib ki, kəbin nikah haqqında şəhadətnamə əsasında oxunsun"
Mehriban Zeynalova: "Bu gün erkən nikahları araşdıranda görürsən ki, ortada rəsmi nikah yoxdur, amma dini nikah, yəni kəbin kəsilib"
Bütün islam ölkələrində olduğu kimi, Azərbaycanda da rəsmi dövlət nikahı ilə yanaşı, dini kəbin də kəsilir. Bir çoxları dini kəbinin vacib olmadığını, əsasən rəsmi dövlət nikahının zəruri olduğunu desə də, bunun əksini düşünüb hər iki nikahı kəsdirənlər də var. Bəzən isə, sadəcə, dini kəbinlə kifayətlənən cütlüklər də yetərincədir. Dini kəbin kəsdirənlər gələcəkdə müxtəlif problemlərlə üzləşir.
Bu gün istənilən məscidə və ya mollalıq fəaliyyəti ilə məşğul olan şəxsə yaxınlaşaraq, ona müəyyən məbləğdə pul ödəyəndən sonra kəbin kəsdirmək mümkündür. Qanunvericiliyə əsasən, mollaya rəsmi nikah haqqında şəhadətnamə təqdim edilmədiyi halda, kəbin kəsə bilməz. Amma bəzi hallarda mollalar ailə qurmaq istəyən cütlükdən aldıqları "şirinlik" müqabilində kəbin kəsməklə ailə dəyərlərini heçə sayır.
Qafqaz Müsəlmanları İdarəsinin (QMİ) Fətva və moizə şöbəsinin əməkdaşı Valeh Nəsirov media nümayəndələrinə açıqlamasında bildirib ki, idarənin təyin etmədiyi şəxslərin qanunsuz, eləcə də dinə zidd şəkildə nikah bağlaması əməllərinə qarşı hər zaman mübarizə aparılıb.
Onun sözlərinə görə, QMİ regionda olan ruhanilərin hər birinə dövlət nikahı olmadan dini kəbin bağlamamağı tapşırıb: "Bu qadağaya əməl etməyənlər qanunamüvafiq şəkildə cəzalandırılır. QMİ ilə əlaqəsi olmayan din xadimləri qanunsuz dini nikah bağladığı halda, onlara qarşı həm dövlət, həm də idarə tərəfindən mübarizə aparılır. Ölkə ictimaiyyəti də bu mübarizədə fəallıq göstərməlidir. Biz dünyəvi dövlət olduğumuza görə bu hala yol verən din xadimləri dövlət qanunlarına uyğun şəkildə mühakimə olunmalıdır. Əgər Gəncə şəhərində doğrudan da kimsə qadağan olunmuş nikah bağlayıbsa, dövlət tərəfindən öz cəzasını alacaq".
Məlumat üçün bildirək ki, neçə gündür kütləvi informasiya vasitələrində Gəncə şəhərində əminin qardaşı qızını qaçırması və onunla dini nikaha daxil olması məsələsi ilə bağlı məlumatlar yayılıb.
"Məşədi Dadaş" məscidinin axundu Hacı Şahin Həsənli bildirdi ki, din əmi və qardaşı qızının münasibətini kökündən qanunsuz hesab edir və bu münasibətin qurulması düzgün deyil: "Bu adamlara dini kəbin oxuna bilməz. Əgər oxunarsa, onun heç bir legitimliyi olmur, batil kəbindir. Qafqaz Müsəlmanları İdarəsi əməkdaşlarına təlimat verib ki, kəbin nikah haqqında şəhadətnamə əsasında oxunsun".
"Təmiz Dünya" İctimai Birliyinin sədri Mehriban Zeynalovanın sözlərinə görə, Gəncədə yaşanan məlum hadisə azad sevgi, azad cinsi münasibətlər müstəvisindən çıxıb: "Məlumatdan da görünür ki, əmi ilə qardaşı qızının münasibətlərinə dini kəbinlə dəstək verilib. İlk növbədə araşdırılmalıdır ki, rəsmi nikah olmadan bu kəbini kim kəsib? Acı da olsa həqiqətdir ki, əksər hallarda cəmiyyətdə baş verən bəlalara, biabırçılıqlara imza atanlar elə dırnaqarası din adamlarıdır. Bu gün erkən nikahları araşdıranda görürsən ki, ortada rəsmi nikah yoxdur, amma dini nikah, yəni kəbin kəsilib. Əslində, erkən evliliyin səbəbkarları da elə onlardır. 13-14 yaşlı qızların özündən 10 yaş böyük kişi ilə ailə qurmasına ilk növbədə elə dindarlar şərait yaradır. Qafqaz Müsəlmanları İdarəsi dəfələrlə xəbərdarlıq edib ki, rəsmi nikah olmadan dini kəbin kəsilə bilməz".
M.Zeynalova bildirdi ki, ailə dəyərlərinin aşınması prosesi çoxdan başlayıb: "Bunun qarşısını almaq üçün müəyyən işlər
görülməlidir".
Günel CƏLİLOVA
