Namət Məmmədzadə: "Bu, sadəcə, həm qanunvericilik, həm də etik cəhətdən düzgün deyil"
Dünyanın ən populyar messencerlərindən biri də "WhatsApp"dır. Milyonlarla insan bu tətbiqetmə vasitəsilə ünsiyyət qurur. Bu cür populyarlığa baxmayaraq, adıçəkilən sosial şəbəkədə yazılan yazışmaların gizliliyinə heç kim əmin deyil. Çünki buna səbəb son günlər müzakirə mövzusuna çevrilən "Mage" proqramıdır. Bu proqram qısa müddət ərzində məşhurlaşıb. Proqramın mahiyyəti istənilən şəxsin mobil nömrəsini daxil etməklə həmin nömrənin kimə aidliyi və hansı ərazidə olmasını göstərməsidir. Bir sözlə,
şəxsi məlumatların yayılmasını dəstəkləyən proqramlardan biridir.
Məlumat üçün qeyd edək ki, "Mage" proqramı android istifadəçiləri üçün pleystordan yüklənir. Lakin qısa müddət ərzində sosial şəbəkələrdə və insanlar arasında məşhurlaşmağı bacaran "Mage" proqramının Azərbaycanda istifadəsinə qadağa qoyulub.
İT üzrə mütəxəssis Namət Məmmədzadənin sözlərinə görə, proqramın istifadəsinə qadağa qoyulması düzgün addımdır: "Çünki proqram avtomatik olaraq sizin telefonunuzda olan kontaktları kopyalayır və öz məlumat bazasında saxlayır. Sadəcə olaraq test etsəydiniz, görəcəkdiniz ki, məsələn, 9999999 nömrəsi bir telefonda X adı ilə, digərində Y adı ilə yazılıbsa, hər dəfə random olaraq sistem gah X, gah da Y göstərirdi. Yəni proqram özü üçün limitlənməyəcək kontent toplamaqla məşğuldur. Ola bilsin ki, sonradan bu kontenti satışa, hətta başqa niyyətlərlə istifadəyə çıxara bilərlər. Bu, məsələnin bir tərəfidir. İkinci bir tərəfdən isə, burada hamının nömrəsi bazaya qeyd olunur. Yəni sadə insandan tutmuş, məmurlara qədər hər kəsin nömrəsi qeyd olunur. Sosial şəbəkələrdə hətta bəzi məmurların nömrələri paylaşıldı. Bu, sadəcə, həm qanunvericilik, həm də etik cəhətdən düzgün deyil. Çünki kiminsə şəxsi həyatı açıq şəkildə ictimailəşdirilir. Buna görə də proqramın istifadəsinə qadağa qoyulmasını müsbət hal kimi qiymətləndirirəm".
Günel CƏLİLOVA
