Azər Allahverənov: "Ölkə ərazisinə daxil olan əcnəbi vətəndaşla bağlı bütün məlumat miqrant kartında qeyd olunur"
Azərbaycana viza tələb olunmayan qaydada gələn əcnəbilər və ya vətəndaşlığı olmayan şəxslərə onlar barədə məlumatı özündə əks etdirən və onların ölkədə müvəqqəti olma müddətinə nəzarət etmək imkanı verən sənəd - miqrasiya kartı veriləcək. Milli Məclisin yaydığı məlumata əsasən, bununla bağlı Miqrasiya Məcəlləsinə əlavələr edilir.
Yeni əlavələrə əsasən, Azərbaycana viza tələb olunmayan qaydada gələn əcnəbilər və ya vətəndaşlığı olmayan şəxslər miqrasiya kartını doldurmalı və Azərbaycanın dövlət sərhədinin buraxılış məntəqələrindən keçərkən pasport və ya digər sərhədkeçmə sənədi ilə birgə təqdim etməlidir. Bəzi əcnəbilər üçün isə miqrasiya kartının doldurulması tələb olunmur. Həmin əcnəbilər xarici ölkələrin Azərbaycanda fəaliyyət göstərən diplomatik nümayəndəlikləri və konsulluqlarının, beynəlxalq təşkilatların nümayəndəliklərinin əməkdaşları, inzibati-texniki xidmət heyətinə daxil olan şəxslər və onların ailə üzvləri, həmçinin, Azərbaycana diplomatik missiya ilə gələn və ya diplomatik pasportlara malik olan şəxslər, Azərbaycanda müvəqqəti və ya daimi yaşamaq üçün icazə almış əcnəbilər və vətəndaşlığı olmayan şəxslərdir.
Miqrasiya kartı əcnəbilərə və ya vətəndaşlığı olmayan şəxslərə müvafiq icra hakimiyyəti orqanının əməkdaşları və ya nəqliyyat xidmətləri göstərən şirkətlərin nümayəndələri tərəfindən pulsuz verilir. Miqrasiya kartı əcnəbilər və ya vətəndaşlığı olmayan şəxslər tərəfindən ölkəyə gəldikləri nəqliyyat vasitəsində (təyyarə, gəmi, avtobus, qatar) şəxsi nəqliyyatı ilə və ya piyada gəldikdə bilavasitə Dövlət Sərhəd Xidmətinin buraxılış məntəqəsində doldurulur.
Mövzu barədə danışan adıçəkilən sahə üzrə ekspert Azər Allahverənov bildirdi ki, miqrasiya kartı olduqca ciddi bir sənəddir: "Ölkə ərazisinə daxil olan əcnəbi vətəndaşla bağlı məlumat miqrant kartında qeyd olunacaq. Bu baxımdan viza rejimi tələb olunmayan ölkələrdən gələn əcnəbilər üçün miqrant kartı tətbiq olunacaq. Bir ölkədən başqa bir ölkəyə gələn şəxs həmin kartın məlumat bölməsini doldurur. Həmin miqrantın karta qeyd etdiyi informasiya Dövlət Miqrasiya Xidməti tərəfindən qeydiyyata alınır. Bu ona görə lazımdır ki, istənilən əcnəbi şəxs haqqında məlumatı həmin kart vasitəsilə öyrənmək olar". Həmsöhbətimizin sözlərinə görə, əvvəllər ölkəyə qısa müddət ərzində gələn əcnəbilər haqqında aidiyyəti qurumların məlumatı məhdud şəkildə olurdu. Ancaq belə bir kart tətbiq olunandan sonra Dövlət Miqrasiya Xidmətində miqrant haqqında geniş məlumat olacaq".
Ekspertin sözlərinə görə, dünyanın bir sıra ölkələrində miqrant kartı tətbiq olunur. Qonşu Rusiyada miqrant kartı zəruri sənəd kimi istifadə olunur".
Günel CƏLİLOVA
