Əlimə "Aləm" adında bir dərgi düşdü. Vaxt tapıb onu rahat şəkildə oxudum. Vüqar Həmatinin baş redaktorluğu ilə nəfis tərtibatda nəşr olunan ədəbi-bədii, elmi, publisistik jurnal öz maraqlı və rəngarəng yazılarına görə ilk baxışdan məni özünə bağladı.
Səhifədən-səhifəyə keçdikcə Azərbaycan adlı məmləkətimizin yaşamına biçilən tolerantlıq həyat tərzinə heyran düşdüm və ən əsası, burada ayrı-ayrı millətlərin hər bir vətəndaşına olan səmimi hörmətin ucalığını gördüm. Necə deyərlər, dövlətimizə, milli birliyə, ordumuza, iqtisadiyyatımıza, dilimizə, dinimizə, ərazi bütövlüyümüz və mənəvi-əxlaqi dəyərlərə heç bir xələl gətirmədən Talış xalqının mənəvi mühiti, ədəbi-bədii dəyərlər jurnalda sonsuz sevgi, sayğı və fəxarət duyğusu ilə təbliğ olunur. Bundan əlavə, burada geniş yer tutan bədii ədəbiyyat nümunələrindən görünür ki, istedadlı gənclərin üzə çıxmasına jurnal böyük səy göstərir. Bütün bu bədii yaradıcılığın - istər nəsr olsun, istərsə poeziya - mayası Azərbaycan vətənpərvərliyindən, yurdsevərliyindən, milli düşüncədən bəhrələnir. Bütün bunlara görə "Aləm" özü bir aləm olmaqla Azərbaycan oxucusuna, mədəni ictimaiyyətə dəyərli bir hədiyyə ola bilər.
Jurnalın oxucuya doğmalığı bir də ondadır ki, onun səhifələrində sadə insanlardan alimə qədər bütün zümrələrə mənsub olan adamların imzaları var. Hər yazılan da Azərbaycanda yaşayan xalqlara ayrıseçkilik qoymadan onların mənəvi dünyasının zənginliyinə tapınmaqla ərsəyə gəlir.
"Aləm"də bütün janrlarda yazılar gedir. Yazıların mahiyyətindən görünür ki, o, həqiqətən yurd ətirli, həm də qeyrət jurnalıdır. Yurd yerlərimizin tarixi və tanınmış şəxsiyyətlər haqqında gedən məqalələr, cənub bölgəsində yaşayan şair və yazıçıların əsərləri maraqla oxunur. Çünki bu yazılanlar hamısı yalnız Azərbaycanın mədəni həyatına xidmət edir, keçmiş arasında körpü yaratmaqla gəncləri əsl vətəndaş olmağa çağırır.
Oxucu jurnalda Azərbaycan ədəbiyyatında öz yeri olan tanınmış simalarla rastlaşır. Tofiq İlham, Nəriman Tolişi, Bəxtiyar Ruşni, Xanəli Tolış, Camal Lələzoə, Allahverdi Bayrami tez-tez öz şipşirin misraları ilə könül sevindirir. Onların yaradıcılığında vətən təəssübkeşliyi, vətən sevgisi daha dolğundur. Sanki onların hər misrası həyatın özüdür.
Artıq mən "Aləm"in hər nömrəsini izləyirəm. Demək olar ki, o öz başına qayğıkeş, humanist adamları toplayıb. Onlar həmişə yenilik hissi ilə yaşayır, təşəbbüslər irəli sürür, öz ağlı, biliyi, düşüncəsi ilə doğma Azərbaycan ədəbiyyatına zənginlik gətirirlər.
Bəli, "Aləm" jurnalı ülvi bir missiyanı böyük vətənpərvərliklə yerinə yetirir. Mayası nur, qayası nur Azərbaycanın bənzərsiz bir guşəsi sayılan cənub bölgəsinin torpağında əsrlər boyu öz dili və dinini, yaşam fəlsəfəsini, əxlaq-davranış qaydaları, tarixini, ədəbiyyatını qürurla aləmə çatdırır. Hər deyimin dəyərli olması üçün baş redaktor Vüqar Həmati öz ürəyinin yağını belə verməyə çəkinmir. Bunun nəticəsidir ki, jurnal oxucu qəlbinə rahatlıqla yol tapır. Onun tutduğu yol son dərəcə həyatidir, faydalıdır...
Zəfər ORUCOĞLU,
Azərbaycan Jurnalistlər Birliyinin üzvü, "Qızıl qələm", "Xalqın nüfuzlu ziyalısı", "İlin vətənpərvər adamı" media mükafatçısı.
