Məktəblə tanışlıq zamanı diqqətimi çəkən Kyokuşinkayhan və cuicitso idman növü üzrə ilin ən texnikalı idmançısı seçilmiş 81 nömrəli məktəbin 9-cu sinif şagirdi Fidan İsmayıllının uğurları oldu. İlk təəssüratımın müsbət məcraya yönəlməsi burda keçiriləcək tədbirin maraqlı alınacağından xəbər verirdi.
Öyrəndim ki, məktəbin idman zalı yoxdur və əlavə korpusun olmaması, həmçinin şagird sıxlığı da əsas problem kimi qalmaqdadır. Tədbir hələ başlamasa da, akt zalına gələn şagirdlərin üzündəki maraq dolu ifadəni oxumaq elə də çətin deyildi- polislər yenə də maarifləndirmək üçün gəlmişdilər.
Əvvəlcə məktəbin direktoru Mehriban Əlizadə tədbiri açıq elan edərək rayon rəhbərliyi və polis idarəsi tərəfindən narkomaniya ilə mübarizəyə həsr olunmuş və mütəmadi olaraq keçirilən tədbirlərdən, görülən işlərdən danışdı.
Narkomaniya bəlasına düçar olmuş məktəblinin üzləşdiyi problemlərin şagirdlərin iştirakı ilə hazırlanmış "Yaşamaq istəyi" adlı səhnəcik vasitəsilə təqdim olunması iştirakçıların dərin marağına səbəb oldu.
Sabunçu Rayon İcra Hakimiyyəti başçısının I müavini, Rayon İcra Hakimiyyəti başçısı yanında Narkomanlığa və Narkotik Vasitələrin Qanunsuz Dövriyyəsinə Qarşı Mübarizə üzrə Komissiyanın sədri Güloğlan Məmmədov narkomaniyanın fəsadlarından, sağlam həyat tərzi istiqamətində maarifləndirmənin vacibliyindən, ölkəmizdə narkomaniyaya qarşı aparılan mübarizədən danışarkən dedi ki, narkomanlıq və narkobiznes cəmiyyətin mənəvi, əxlaqi dəyərlərini sarsıdır, sosial-iqtisadi inkişafa mənfi təsir gostərir, insanların həyat və sağlamlığına ciddi təhlükə yaradır və ən əsası, cinayətkarlığın artmasına səbəb olur.
Rayon Polis İdarəsinin rəisi, polis polkovniki Eldar İlyasov insan ölümünə yol açan müxtəlif səbəblərdən-müharibələrdən, aclıqdan, təbii fəlakətlərdən söhbət açdı. Ancaq narkomaniyanın təkcə bir nəfəri deyil, yüzlərlə insanı ağuşuna almasını əsl fəlakət adlandırdı və qeyd etdi ki, bu gün ölkəmizdə narkomaniyaya qarşı çox ciddi mübarizə aparılır və maarifləndirmə tədbirləri həyata keçirilir.
E.İlyasov ötən il 934 kiloqram narkotik vasitənin qanunsuz dövriyyədən çıxarılmasına diqqət çəkərək bildirdi ki, hər şey məktəbdə, ailədə öz həllini tapmır və bəla ilə mübarizəyə cəmiyyətin dəstək verməsi ən önəmli şərtlərdəndir. Təbliğat və mübarizə aparatlarının birgəlik nümayiş etdirmələri gəncliyimizi və gələcəyimizi qorumağa yönəlməli, onlara sağlam vərdişləri, məsələn idmanı, yaxşı oxumağı aşılamlıyıq. O, həmçinin, rayonda 8 idman kiompleksinin fəaliyyət göstərdiyini və onların qapılarının təmənnasız olaraq gənclərin üzünə açıq olduğunu bildirdi.
Tədbirdə çıxış edən həkim-narkoloq Qalib Məmmədov müəyyən yaş dövrlərində uşaqların, yeniyetmələrin özlərini təsdiq etmək üçün hər hansı bir "qəhrəmanlığa" hazır olduğunu və onların bu çılğınlıqlarından da bəzi qüvvələrin vaxt itirmədən yararlandığını diqqətə çatdırdı.
Sonra çıxış edən Rayon Gənclər və İdman İdarəsinin rəisi Rakif Əliyev, Bakı Şəhər baş Təhsil İdarəsinin metodisti Tahirə Qədimova yeniyetmə və gənclərin narkomanlıq və digər zərərli vərdişlərdən qorunması istiqamətində aparılan işlər barədə söhbət açaraq gənc nəslin savadlı, vətənpərvər ruhda böyüməsi, sağlam inkişaf etməsi, zərərli vərdişlərdən uzaq olması üçün görülməli işlərdən danışdılar və müntəzəm olaraq maarifləndirici tədbirlərin keçirlməsinin vacibliyini vurğuladılar.
Sonda qonaqlar mövzu ətrafında şagirdləri maraqlandıran sualları cavablandırdılar.
Hafiz Təmirov, polis mayoru
