Əjdər Ağayev: "Təmayüllü məktəbləri bitirənlər digər məktəblilərdən savad baxımından fərqlənməyi bacarır"
Ölkəmizdə aparılan təhsil islahatının tərkib hissəsi olan təmayülləşmə sahəsində son illər böyük işlər görülməkdədir. Təsadüfi deyil ki, gələcəkdə müxtəlif sahələr üzrə peşəkar kadrların hazırlanmasında orta təhsilin müəyyən mərhələdən etibarən təmayülləşməsi həlledici amillərdən biri hesab olunur.
Məlumat üçün bildirək ki, hazırda respublikanın 5 şəhər və 36 rayonunu əhatə edən 182 məktəbdə təmayül sinifləri fəaliyyət göstərir. Hər bir təmayül istiqaməti üzrə ayrıca tədris plan və proqramları hazırlanıb təsdiq edilib. Təmayül istiqamətləri üzrə tədris planlarında həftəlik 30 dərs saatı müəyyən olunub.
2017-2018-ci dərs ilində ümumtəhsil məktəblərində təmayülləşmənin tətbiqi əvvəlki illərlə müqayisədə genişləndiriləcək, təmayül siniflərində şagirdlərin sayı minimum 20 nəfər olmaqla komplektləşdiriləcək.
Respublikanın bütün məktəblərində təmayülləşmə tətbiq oluna bilərmi?
Mövzu ilə bağlı fikirlərini bildirən Azərbaycan Təhsil Şurasının sədri Əjdər Ağayev təmayüllü məktəblərin hələ sovet dövründən mövcud olduğunu dilə gətirdi. Onun sözlərinə görə, bu məktəblərdə təmayül yalnız 10-11-ci siniflərdə deyil, əvvəldən təşkil olunurdu: "Yəni şagird hansı sahə üzrə ixtisaslaşırdısa, o təmayüllü məktəbə də qoyulurdu. O vaxt kimya-biologiya, fizika-riyaziyyat, xarici dillər, idman təmayüllü məktəblər var idi. Artıq belə məktəblərdə fənnlər ümumiləşdirilib keçirilir, yəni məhz bir ixtisas üçün tədris olunmur. Bu günlərdə belə məktəblərin sayı azdır. Təmayüllü məktəblərdə təhsil prosesində o təmayül hansı fənlərdən idisə, həmin fənlərə dərs saatlarını daha çox ayırırdılar. Ümumi fənlərə daha az, təmayülə daha çox üstünlük verirdilər".
Ə.Ağayevin sözlərinə görə, təmayüllü məktəbləri bitirənlər digər məktəblilərdən savad baxımından fərqlənməyi bacarır: "Hazırda tanıdığımız siyasətçilər və təhsil, elm işçiləri, dövlət xadimlərinin əksəriyyəti məhz həmin təmayüllü məktəblərin məzunlarıdır. Ümumilikdə, təmayülləşmənin aparılması təhsil sistemində böyük üstünlüklərin olacağından xəbər verir. Bu artıq təhsilin inkişafının əsas göstəricisidir. Bununla ali məktəbə hazırlaşan şagird gələcəkdə hansı ixtisasda təhsil almaq istədiyini dəqiq müəyyənləşdirəcək. Zənnimcə, bütün orta məktəblər təmayülləşməlidir. Təmayülləşmə prosesi həm də repetitorluğun qarşısını alacaq".
Günel CƏLİLOVA
