Məhərrəm Zülfüqarlı: "Sözügedən amil gələcəkdə Azərbaycanın ərazi bütövlüyünün bərpasında mühüm rol oynayacaq"
"Aprel döyüşləri hərbi dərsliklərə salınmalıdır". Bunu Azərbaycan Prezidenti, Ali Baş Komandan İlham Əliyev aprel qələbəsinin ildönümü ilə əlaqədar bir qrup hərbçi ilə görüşündə deyib:
"Həm peşəkarlıq, həm də vətənpərvərlik ruhu baxımından aprel döyüşləri bir daha göstərdi ki, Azərbaycan xalqı qəhrəman xalqdır. Bir daha onu göstərdi ki, biz bu vəziyyətlə barışmayacağıq. Onu göstərdi ki, xalq-iqtidar birliyi bu gün Azərbaycanda yüksək səviyyədə təmin olunur, möhkəmlənir. Aprel döyüşləri bizim şanlı hərbi qələbəmizdir, dövlətimizin, xalqımızın, ordumuzun gücünü göstərən qələbədir. Aprel döyüşləri nəticəsində Füzuli, Cəbrayıl və Ağdərə rayonlarının işğaldan azad edilmiş ərazilərində bu gün Azərbaycan bayrağı dalğalanır. Bu döyüşlər onu göstərir ki, Azərbaycan xalqı və dövləti heç vaxt işğalla barışmayacaq, öz ərazi bütövlüyünü, nəyin bahasına olursa-olsun, bərpa edəcək".
Təbii ki, ölkə başçısının məlum fikirlərindən sonra müvafiq qurumlar bu məsələyə baxmalıdır. Çünki aprel döyüşləri mühüm dönüş nöqtəsi sayıla bilər. Odur ki, aprel döyüşlərinin ətraflı şəkildə öyrənilməsi, onun nəticələrinin təbliği vacibdir. Azərbaycan Ordusunun əsgər və zabitləri aprel döyüşləri zamanı böyük qəhrəmanlıqlar göstərib.
Maraqlıdır, bəs mütəxəssislər buna necə yanaşır?
Məsələyə münasibət bildirən tarix elmləri üzrə fəlsəfə doktoru Məhərrəm Zülfüqarlının sözlərinə görə, buna ehtiyac var: "Bir tarixçi kimi buna müsbət yanaşıram. Aprel döyüşləri həm düşmən tərəfdə, həm beynəlxalq aləmdə olan bir yanlış fikrin üstündən xətt çəkdi. Guya Azərbaycan xalqı get-gedə bu işğalla barışır və gələcəkdə də buna uyğunlaşacaq. Ancaq aprel döyüşləri göstərdi ki, Azərbaycan öz torpağını heç kimə verməyə hazırlaşmır. Əksinə, tezliklə döyüşərək qısa bir müddətdə öz torpaqlarını işğaldan azad etmək əzmindədir. Ona görə də bu, mütləq dərsliklərə salınmalıdır. O üzdən, Prezidentin fikri ilə tam razıyam. Aprel döyüşləri ilə yanaşı, ümumiyyətlə birinci Qarabağ müharibəsi və digər dövrlərdə Azərbaycan ərazilərində erməni quldurlarına qarşı döyüşmüş qəhrəmanlarımızın təbliği gücləndirilməlidir. Eyni zamanda, onların fəaliyyəti mütləq dərsliklərə salınmalıdır. Sözügedən amil gələcəkdə Azərbaycanın ərazi bütövlüyünün bərpasında mühüm rol oynayacaq".
Vidadi ORDAHALLI
