Bahadur Bilalov: "Çimərlik turizminin inkişafı ilə bağlı aidiyyəti qurumlara xüsusi tapşırıqların verilməsi bu sahənin inkişafına gətirib çıxaracaq"
Cənubi Qafqazda Azərbaycan daha keyfiyyətli qumu ilə zəngin olan çimərliklərə malik yeganə ölkədir. Yay fəslində insanların bir qismi istirahət üçün məhz çimərliklərə getməyi sevir. Çimərlik turizmi kütləvi turizmin bir növü sayılır. Bir sıra Avropa ölkələrində çimərlik turizmi geniş yayılıb.
Kütləvi turizmin bir növü olan çimərlik turizmini inkişaf etdirməklə Azərbaycana gələn turistlərin sayını dəfələrlə artırmaq olar.
Məlum olduğu kimi, Xəzər dənizinin Azərbaycana mənsub olan sahillərində yeni çimərliklər salınacaq. Bu, Azərbaycan Prezidenti İlham Əliyevin sərəncamı ilə təsdiq edilən "Azərbaycan Respublikasında çimərlik turizminin inkişafına dair 2017-2020-ci illər üçün Tədbirlər Planı"nda əksini tapıb. Tədbirlər Planına əsasən, 2017-ci ildə Mədəniyyət və Turizm Nazirliyi, Ekologiya və Təbii Sərvətlər Nazirliyi, Səhiyyə Nazirliyi, Fövqəladə Hallar Nazirliyi, Əmlak Məsələləri Dövlət Komitəsi, yerli icra hakimiyyəti orqanları Xəzər dənizinin Azərbaycana mənsub olan sahillərində yeni çimərliklər salınması üçün müvafiq sahilboyu ərazilərin aidiyyəti qurumlarla razılaşdırılaraq müəyyən edilməsini, model çimərlik layihələri əsasında çimərliklərin yaradılması ilə bağlı təkliflərin hazırlanmasını və sahibkarların bu barədə məlumatlandırılmasını təmin etməlidir.
Mədəniyyət və Turizm Nazirliyi, Əmlak Məsələləri Dövlət Komitəsi, Dövlət Şəhərsalma və Arxitektura Komitəsi, yerli icra hakimiyyəti orqanları 2017-2018-ci illərdə, beynəlxalq təcrübə nəzərə alınmaqla, Xəzər dənizinin Azərbaycana mənsub olan bölməsinin sahilboyu və çimərlik üçün müəyyən edilmiş yararlı ərazilərinin yaxınlığında müvafiq infrastruktur obyektlərinin inşasına, həmçinin aidiyyəti üzrə sahibkarların təklif etdiyi layihələrin dəstəklənməsinə dair təkliflərin hazırlanmasını təmin etməlidir.
Fövqəladə Hallar Nazirliyinə, yerli icra hakimiyyəti orqanlarına isə 2017-2020-ci illərdə çimərliklərin akvatoriyalarında, çimərliklərarası sahələrdə (ən azı 200 metrdən bir) su nəqliyyatının sərbəst hərəkəti üçün xüsusi zolaqların normalara uyğun olaraq yaradılması tapşırılıb.
Ölkədə çimərlik turizminin inkişafı ilə bağlı ölkə başçısı tərəfindən sərəncam verilməsi bu sahənin inkişafına səbəb olacaq. Turizm sahəsi üzrə ekspert Bahadur Bilalov hesab edir ki, turizmin inkişafı üçün çimərlik ərazilərinə xüsusi diqqət ayrılmalıdır: "Azərbaycan Respublikasında çimərlik turizminin inkişafına dair 2017-2020-ci illər üçün Tədbirlər Planı"nda çimərlik turizminin inkişafı üçün Xəzərin Azərbaycana aid olan hissəsində yeni çimərliklərin yaradılmasının nəzərdə tutulması turistlərin diqqətinə səbəb olacaq. Çimərlik turizminin inkişafı ilə bağlı aidiyyəti qurumlara xüsusi tapşırıqların verilməsi bu sahənin inkişafına gətirib çıxaracaq.
Bəllidir ki, yay fəslində tək turistlər deyil, eyni zamanda yerli vətəndaşlar da çimərlikdə istirahət etməyə üstünlük verir. Bu səbəbdən də həmin sahənin inkişafı önəmlidir. Çimərliklərdə bir neçə qayda var ki, onların tətbiq olunmasına ehtiyac var. Əsas istiqamətlər təhlükəsizlik, sonra suyun təmizliyi və turistlərin məlumatlandırılmasıdır. Həmçinin, turistlərin istirahəti və sağlamlığı nəzərə alınmalıdır".
Həmsöhbətimiz xüsusi olaraq vurğuladı ki, çimərliyə giriş pulsuz olmalıdır: "Çimərlikdə əlavə xidmətlər olarsa, bu, kommersiya şərtlərinə uyğun şəkildə aparılmalıdır".
Günel CƏLİLOVA
