Ərşad Hüseynov: "Bəziləri elə bilir ki, qəza nəticəsində maşın yolda olan dayanacağa və ya lövhəyə zərər yetiribsə..."
Azərbaycanda nəqliyyat vasitələrini və ya yolları yararsız vəziyyətə salma əməlinə görə tətbiq olunan cəzanın cəriməsi 6 dəfə artırılır.
Cinayət Məcəlləsinin 266-cı maddəsinə əsasən, dağıtmaq, zədələmək və ya başqa üsulla yolların, nəqliyyat vasitələrinin və ya nəqliyyat avadanlığının yararsız vəziyyətə salınması ehtiyatsızlıqdan zərərçəkmiş şəxsin sağlamlığına az ağır və ya ağır zərər vurulmasına və ya külli miqdarda ziyan vurulmasına səbəb olduqda 500 manatdan 1000 manatadək miqdarda cərimə və ya 2 ilədək müddətə islah işləri və ya 2 ilədək müddətə azadlıqdan məhrum etmə ilə cəzalandırılır. Burada cərimənin miqdarının 3 min manatdan 6 min manatadək artırılması təklif edilir.
Bundan başqa, Məcəllənin 267-ci (Nəqliyyat vasitələrinin təhlükəsiz işləməsini təmin edən qaydaları pozma) maddəsində nəzərdə tutulan cərimənin miqdarının 2000 manatdan 3 min manatadək artırılması təklif olunur. Hazırkı qanunvericiliyə görə, bu miqdar 1000 manatdan 2000 manatadəkdir.
Dəyişiklik layihəsi Milli Məclisin plenar iclasında müzakirəyə çıxarılacaq.
Məsələ ilə bağlı fikir bildirən nəqliyyat sahəsi üzrə ekspert Ərşad Hüseynov "Bakı-Xəbər"ə açıqlamasında qeyd etdi ki, yolların bilərəkdən dağıldılmasına görə qanunvericilik tərəfindən cəza müəyyən olunub: "Burada söhbət yolları yararsız vəziyyətə salanların cəzalandırılmasından gedir. Nəqliyyat vasitələrinin hərəkət etdiyi yolları istifadəyə yararsız vəziyyətə salanlara qarşı cəzalar sərtləşdirilir. Cəzanın sərtləşdirilməsinin tərəfdarıyam. Təsəvvür edin ki, kimsə, ya da hansısa qurum maşınların hərəkət etdiyi yolu qazır və orada bir çuxur əmələ gəlir. Yolun qazılmasından xəbərsiz olan sürücü həmin ərazidən keçərkən çuxura düşür və nəticədə qəza baş verir. Xatırladım ki, yol-qəza hadisəsi zamanı bardur və ya digər yollarda olan hansısa vasitələrə zərər gələrsə, bunun cəriməsi 500-1000 deyil, 40 manatdır. Bəziləri elə bilir ki, qəza nəticəsində maşın yolda olan dayanacağa və ya lövhəyə zərər yetiribsə, onun cəriməsi 6 dəfə artırılır".
Həmsöhbətimizin sözlərinə görə, Azərbaycanda nəqliyyat vasitələrini və ya yolları yararsız vəziyyətə salma əməlinə görə tətbiq olunan cəzanın sərtləşdirilməsi düzgün addımdır.
Günel CƏLİLOVA
