Davud Rəhimli: "Bundan sonra protez-ortopedik məmulatlar müasir texnologiyalar əsasında hazırlanacaq"
Xəbər verildiyi kimi, Prezident İlham Əliyev Azərbaycanın ərazi bütövlüyünün, müstəqilliyinin və Konstitusiya quruluşunun müdafiəsi zamanı əlil olmuş şəxslərin yüksək texnologiyalı reabilitasiya vasitələri ilə təmin olunmasına dair əlavə tədbirlər haqqında sərəncam imzalayıb.
Azərbaycanın ərazi bütövlüyünün, müstəqilliyinin və Konstitusiya quruluşunun müdafiəsi zamanı əlil olmuş şəxslərin sosial müdafiəsinin gücləndirilməsi və reabilitasiyası daim dövlətin diqqət mərkəzindədir. Yüksək vətənpərvərlik nümunəsi göstərərək yaralanmış hərbçilərimizin sağlamlığının bərpasına ötən dövr ərzində xüsusi qayğı göstərilib, onların müalicəsi istiqamətində səmərəli reabilitasiya tədbirlərinin həyata keçirilməsi təmin olunub.
Sərəncamda qeyd olunur ki, Azərbaycanın ərazi bütövlüyünün, müstəqilliyinin və Konstitusiya quruluşunun müdafiəsi zamanı əlil olmuş şəxslərin yüksək texnologiyalı reabilitasiya vasitələri ilə təmin edilməsi məqsədilə Əmək və Əhalinin Sosial Müdafiəsi Nazirliyinin Protez-Ortopedik Bərpa Mərkəzində yüksək texnologiyalı protezlərin hazırlanması sexinin qurulması üçün Azərbaycanın 2017-ci il dövlət büdcəsində nəzərdə tutulmuş Azərbaycan Prezidentinin ehtiyat fondundan Əmək və Əhalinin Sosial Müdafiəsi Nazirliyinə 2 milyon manat ayrılsın.
Sözügedən protezlərin məhz ölkə daxilində istehsal olunmasına ekspertlər necə yanaşır?
Məsələyə münasibət bildirən Əlil Təşkilatları İttifaqının rəhbəri Davud Rəhimlinin sözlərinə görə, protezlərin yeni texnologiya əsasında ölkə daxilində istehsal olunmasının bir sıra üstünlükləri var: "Məlum olduğu kimi, protez-ortopedik məmulatlar əlillərə pulsuz verilir. Göndəriş əsasında həmin insanlar sözügedən vasitələrlə təmin edilir. Sonuncu sərəncamın bir xüsusiyyəti ondan ibarətdir ki, protez-ortopedik məmulatlar müasir standartlara uyğun olaraq hazırlanacaq. Çünki bu sahədə vəziyyət qabaqcıl təcrübədən geri qalır. Məsələ ondadır ki, həmin vasitələr müasir üsullarla hazırlanmır. Yəni köhnə üsullardan istifadə olunmaqla ərsəyə gətirilir. Prezidentin sərəncamına əsasən, bundan sonra protez-ortopedik məmulatlar müasir texnologiyalar əsasında hazırlanacaq. Burada onların həm istehsal olunması, həm də lazım olan hissələrin ölkəyə gətirilməsi nəzərdə tutulur. Bu da əlilliyi olan ölkə vətəndaşları üçün çox mühüm qərardır. Nəzərə almaq lazımdır ki, köhnə üsullarla hazırlanan protez-ortopedik vasitələr əlillərdə müəyyən fəsadlar yaradır. Həm ölçü baxımından, həm də istifadə cəhətdən fəsadlar əmələ gəlir. Ona görə də haqlı olaraq əlillər tərəfindən şikayətlər səslənir. Digər tərəfdən, həmin vasitələrin xaricdən gətirilməsi baha başa gəlir. Ona görə də Prezidentin bununla bağlı sərəncamı çox lazımlı bir addımdır".
Vidadi ORDAHALLI
