Eyyub Hüseynov: "Sellofan torbalar, təhlükəli streç-filinlərin əksəriyyəti polivenil xlordan hazırlanır"
Əvvəllər sellofan torbalardan istifadə bugünkü kimi geniş yayılmamışdı. Çox vaxt qənaətcil qadınlar bu cür torbaları yuyur, təmizləyir və təkrar istifadə edirdilər. Bu gün isə bəlkə də hər evdə bu cür torbalardan kifayət qədərdir.
Bu torbalardan isə müxtəlif məqsədlərlə istifadə edirlər. Eyni zamanda, market və ya bazarda nəsə alanda məhsul həmin sellofan torbanın içinə yağılır.
Mütəxəssislər bildirir ki, hər gün məişətdə istifadə etdiyimiz, eləcə də istənilən market və ticarət obyektlərində əvəzsiz olan sellofan paketlər sağlamlığımız üçün olduqca zərərlidir.
Artıq bir sıra ölkələrdə sellofan torbalardan istifadə qadağan olunub. Türkiyə mediasının yaydığı məlumata görə, TPF (Türk Pərakəndəçilər Federasiyası) idarə heyətinin sədri Mustafa Altunbilek sellofan paketlərin 1 yanvar 2018-ci ildən etibarən qadağan ediləcəyini söyləyib.
Məlumat üçün bildirək ki, M.Altunbilek bu prosesin ABŞ və bir çox Avropa ölkəsində uğurla həyata keçirildiyini deyib. Onun sözlərinə görə, alış-veriş zamanı müştərilər setka və parça torbalardan istifadəyə yönəldiləcək. Keçid ərəfəsində alış-veriş edənlərə kağız və parça torbalar hədiyyə də ediləcək: "Avropada qadağan olunduğu üçün, müştərilər alış-verişə gələn zaman alacaqları məhsulları qoymağa setka və parça torbalar gətirir".
Maraqlıdır, analoji addım Azərbaycanda da tətbiq oluna bilərmi? Sellofan torbalar digər avadanlıqlarla əvəz oluna bilərmi?
Azad İstehlakçılar Birliyinin sədri Eyyub Hüseynov "Bakı-Xəbər"ə açıqlamasında qeyd etdi ki, sellofan torbalar, təhlükəli streç-filinlərin əksəriyyəti polivenil xlordan hazırlanır. Bu məhsullar hətta 40-50 ildə torpaqda çürümür və ətraf mühiti çirkləndirir: "Polietilen torbalar orqanizm üçün də zərərlidir. Onlardan təkrar istifadə qadağan olunsa da, bəzi şirkətlər istifadə olunan paketləri toplayaraq təkrar istifadə edir. Qara rəngli sellofan torbalar daha təhlükəlidir. Bu cür torbalarda qida saxlamaq məsləhət deyil. Qara və digər rəngli torbalar zibillərin təkrar emalından alınır. Zibilin əridilməsi nəticəsində əldə olunan plastik rənglənir və ondan müxtəlif ölçüdə torbalar hazırlanır. Bəzi torbaların rəngi asanlıqla insanın əlinə və torbada saxlanan ərzağa da keçir. Bu yolla da insan orqanizminə daxil olur".
AİB sədri əhaliyə belə torbalardan istifadə etməməyi məsləhət gördü. Həmsöhbətimiz onu da əlavə etdi ki, şəffaf torbalar çox nazik olduğundan, içərisinə isti çörək və ya digər isti ərzaq qoyduqda əriyir, qırışır və ərzaqla reaksiyaya girir: "Ucuz başa gəldiyi üçün, insanlar sellofanlarda ərzaqları daşımağa üstünlük versə də, bu, insan orqanizmi üçün zərərlidir".
Günel CƏLİLOVA
