Şahin Camalov: "Taksilər arasında pərakəndəliyin olması, heç bir lisenziyası olmayan sürücülərin taksi fəaliyyəti ilə məşğul olması danılmaz faktdır"
Azərbaycanda vahid taksi sistemi yaradılacaq. Belə bir təkliflə Bakı Nəqliyyat Agentliyinin (BNA) baş direktoru Vüsal Kərimli çıxış edib. O qeyd edib ki, Bakıda taksi məsələsi ilə bağlı pərakəndə vəziyyət mövcuddur.
Buna görə biz vahid taksi sisteminin yaradılması ilə bağlı təklif irəli sürmüşük: "Bəzi taksilər "A" nöqtəsindən "B" nöqtəsinə aparmaq üçün dolayı yollardan istifadə edir. Taksi bazası yaradıldıqdan sonra taksilər onlara verəcəyimiz xətlə istifadə edəcək. Əks halda, istənilən şəxs avtomobil damına taksi işarəsi qoyub həmin yoldan istifadə edəcək. Bu məsələdə vətəndaşlarımızın da üzərinə məsuliyyət düşür. Gərək vətəndaşlarımız fərqlənmə nişanı olmayan taksilərdən istifadə etməsin".
Vahid taksi sisteminin yaradılmasına münasibət bildirən Təhlükəsiz Yol Alyansının koordinatoru Şahin Camalov "Bakı-Xəbər"ə açıqlamasında qeyd etdi ki, hazırda paytaxtın nəqliyyat sistemi bərbad haldadır. İstər taksi, istərsə də sərnişindaşıma ilə bağlı vəziyyət ürəkaçan deyil: "Nəqliyyat sektorunda yaşanan problemlərin Bakı Nəqliyyat Agentliyinin yaradılması ilə həll olunacağını düşünürük".
Həmsöhbətimizin sözlərinə görə, artıq Azərbaycan turizm ölkəsinə çevrilməkdədir: "Xatırladım ki, bir neçə il əvvəl belə bir məlumat yayılmışdı ki, bəzi taksi sürücüləri turistləri aldadaraq onlardan daha çox məbləğdə pul almağa çalışır. Taksi sürücülərinin müştərini aldadaraq ondan gedilən məsafədən çox pul alması problem idi. Bunun da səbəbi taksilər arasında pərakəndəliyin olması idi.
Heç bir lisenziyası olmayan sürücülərin taksi fəaliyyəti ilə məşğul olması danılmaz faktdır. Bu səbəbdən də vahid taksi sisteminin yaradılması vacibdir. Bu sistem yeni nizamla inkişaf etməlidir. Ümid edirəm ki, Bakı Nəqliyyat Agentliyi taksi xidməti ilə bağlı üzərinə götürdüyü öhdəliyi yerinə yetirəcək".
Günel CƏLİLOVA
eight:normal'>Məhəmmədəli QƏRİBLİ
