Gözün buynuz qişasının Azərbaycana idxal edilməsinə icazə veriləcək
"Azərbaycana allo sümüyünün gətirilməsinin qanunla qadağan olunması anlaşılmazdır". APA-nın məlumatına görə, bunu bu gün Milli Məclisin Səhiyyə komitəsinin iclasında komitə sədri, akademik Əhliman Əmiraslanov bildirib.
O, deyib ki, sümüyün ölkəyə idxalına qadağa qoyulması səbəbi onun üçün də maraqlıdır. Komitə sədri bu məsələnin Səhiyyə Nazirliyi və digər qurumlarla bir daha geniş müzakirə olunmasını zəruri sayıb: “Çünki bir çox xəstələrin sümüyə ehtiyacı olur".
Qeyd edək ki, alla sümüyü başqa insanlardan alınan sümükdür.
Səhiyyə Komitəsinin iclasında Azərbaycana gözün buynuz qişasının gətirilməsi ilə bağlı xüsusi prosedur tətbiq edilməsi də təklif edilib. İclasda çıxış edən Səhiyyə Nazirliyi Milli Oftalmologiya Mərkəzinin direktoru, respublikanın baş oftalmoloqu Elmar Qasımov deyib ki, Azərbaycanda gözün buynuz qişası ilə bağlı əməliyyat aparmaq üçün xarici klinikalarda təcrübə keçmiş 5 həkim var və həmin həkimlər Oftalmologiya Mərkəzində çalışır. E. Qasımov hazırda özəl klinikalarda belə əməliyyatların aparılmasını məqbul saymayıb: “Gözün buynuz qişasının məhz həmin həkimlərin adına gətirilməsinə icazə verilməsi yaxşı olardı. Həmin həkimlər yox, yəqin ki, onların adına xaricdən bu toxumaları bir təşkilat gətirəcək. Bu, dövlət vəsaiti hesabına alınacaq toxuma olacaq ”.
Səhiyyə Komitəsinin sədri Əhliman Əmiraslanov isə qeyd edib ki, buynuz qişasının gətirilməsi pərakəndə ola bilməz: “Səhiyyə Nazirliyi buna nəzarət edəcək. Biz gözün buynuz qişasını kimin gətirməsi barədə qanun qəbul edə bilmərik. Digər tərəfdən, özəl klinikaların bu sahədə təcrübəsi olan həkimlər varsa, həmin həkimlərə də gözün buynuz qişası gətirilməsinə icazə verilə bilər. Bu məsələni parlament yox, qanunun qəbulundan sonra müvafiq icra hakimiyyəti orqanı, yəni Səhiyyə Nazirliyi tənzimləyəcək”.
Millət vəkili Qənirə Paşayeva ölkədə orqan transplantasiyası, meyitdən orqanların götürülməsi sahəsində problemlərə toxunub və bu problemlərin həlli üçün işçi qrup yaradılmasını təklif edib.
Səhiyyə Komitəsinin üzvü Musa Quliyev hazırda Azərbaycanda gözün buynuz qişası ilə bağlı 3 minə qədər xəstənin əməliyyat gözlədiyini nəzərə çatdırıb: “Özəl klinikalarda şərait olarsa, gələcəkdə onlar da bu əməliyyatı həyata keçirə bilərlər”.
"Gözün buynuz qişasının Azərbaycana idxalına icazə verilməsi çox vacib addım olacaq". Bunu gözün buynuz qişasının Azərbaycana xüsusi icazə əsasında gətirilməsini nəzərdə tutan “Mülki dövriyyəsinə yol verilməyən (mülki dövriyyədən çıxarılmış) əşyaların siyahısı haqqında” və “Mülki dövriyyənin müəyyən iştirakçılarına mənsub olan bilən və dövriyyədə omasına xüsusi icazə əsasında yol verilən (mülki dövryiyəsi məhdudlaşdırılmış) əşyaların siyahısı haqqında” qanunlara dəyişikliklər barədə layihəyə münasibət bildirən Milli Məlisin Səhiyyə komitəsinin sədri Əhliman Əmiraslanov bildirib.
Ə. Əmiraslanov gözün buynuz qişasının Azərbaycana Səhiyyə Nazirliyinin xüsusi icazəsi əsasında gətiriləcəyini söyləyib.
Gömrük Komitəsinin şöbə müdiri Sənan Muxtarov deyib ki, xüsusi icazə olduğu halda ölkəyə gözün buynuz qişasının idxalı mümkün olacaq: “Mən də düşünürəm ki, bununla bağıl xüsusi icazəni Səhiyyə Nazirliyi verəcək. Gömrük Komitəsi bu qanunların qəbul olunmasını dəstəkləyir. Bu qanunların Milli Məclisdə qəbulundan sonra dövlət başçısının müvafiq fərmanlarına, aidiyyəti qanunlara da dəyişikliklər ediləcək”.
