Nadir İsrafilov: "Bu gün kadr probleminin əsas səbəblərindən biri bu sahə üzrə abituriyentlərin ali məktəbə aşağı balla qəbul olunmasıdır"
"Azərbaycanda peşə məktəblərinin yaradılması prosesi daha da sürətlə getməlidir". Bunu Prezident İlham Əliyev Saatlıda pambıqçılığın inkişafı məsələlərinə dair respublika müşavirəsində yekun nitqində deyib. O qeyd edib ki, kadr hazırlığı məsələləri böyük əhəmiyyət daşıyır:
"Ümumiyyətlə, növbəti illərdə peşə hazırlığı Azərbaycanda geniş vüsət almalıdır və buna böyük ehtiyac var. Peşə məktəblərinin yaradılması prosesi gedir, daha da sürətlə getməlidir. Bu proses iqtisadiyyatın ümumi inkişafı ilə uzlaşmalıdır. Biz iqtisadi inkişafımızı planlaşdırırıq. Bizim regional inkişaf proqramlarımız dərc olunur. Yəni biz öz beşillik fəaliyyət planımızı tərtib edirik və eyni zamanda, sənaye, kənd təsərrüfatı və digər sahələrlə bağlı proqramlar bizə yol göstərir. Ona görə peşə hazırlığı buna uyğun şəkildə aparılmalıdır. Nə qədər və hansı istiqamətdə peşə məktəbləri olmalıdır? Kənd təsərrüfatı, sənaye, turizm sahələrində ixtisaslaşmış peşə məktəblərinin yaradılmasına böyük ehtiyac var, çünki bu sahələr bundan sonra da Azərbaycanda sürətlə inkişaf edəcək".
Prezident əlavə edib ki, kənd təsərrüfatı mütəxəssisləri, aqronomlar, bu peşələr üzrə kadrlar hazırlanmalıdır: "Bildiyimə görə burada müəyyən qıtlıq yaşanır və biz gəncləri bu sahəyə cəlb etməliyik, stimullaşdırmalıyıq ki, onlar da bilsinlər, peşəkar olandan sonra onların yaşayış səviyyəsi böyük dərəcədə yaxşılaşacaq. Bu istiqamətdə işlər keçən il görülüb və bu il də davam edəcək".
Ölkə başçısı İlham Əliyevin toxunduğu məsələnin aktual olduğunu ekspertlər də dilə gətirir. Onlar bildirir ki, bu gün aqrar, turizm və sənaye sahələri üzrə ixtisaslaşmış kadrlara ehtiyac var. Adıçəkilən sahələrin inkişafı peşəkar kadrlardan asılıdır.
Təhsil sahəsi üzrə ekspert Nadir İsrafilov "Bakı-Xəbər"ə açıqlamasında qeyd etdi ki, bu gün əksər sahələrdə kadr problemi yaşanır: "Ölkə başçısı düz buyurub ki, bu gün ölkədə kadr problemi yaşanır. Bu gün kadr probleminin əsas səbəblərindən biri bu sahə üzrə abituriyentlərin ali məktəbə aşağı balla qəbul olunmasıdır. Zəncirvari davam edən bu proseslərin ilk həlqəsi isə orta məktəb şagirdlərində müvafiq sahəyə marağın yaranmasıdır. Şagirdlərin aqrar sahəyə marağı yoxdur. Kənd təsərrüfatı sahəsinin incəlikləri barədə şagirdlərə məlumat vermək lazımdır. Bu sahənin ölkə üçün nə qədər əhəmiyyətli olması barədə müəllimlər öz şagirdlərini maarifləndirməlidir".
Həmsöhbətimiz kadr probleminin tək aqrar sahədə deyil, digər sahələrdə də yaşandığını dilə gətirdi: "Turizm sahəsində belə bir problem var. Kadr probleminin ən ciddi fəsadı "Bakı-2015" İlk Avropa Oyunlarında yaşandı. O zaman da bir sıra sahələrdə yerli kadrın olmamasına görə çarəsizlikdən xarici ölkələrdən mütəxəssislər gətirildi. Bu bizə bir dərs olmalıdır".
Günel CƏLİLOVA
