Əvəz Həsənov: "Azərbaycan hökumətinin qanunsuz miqrasiya təşkil edənlərə qarşı sərt mövqe sərgiləməsi düzgün addımdır"
Azərbaycanda qanunsuz miqrasiya təşkil edənlərin 8 min manat cərimələnməsi təklif olunur. Bununla bağlı Cinayət Məcəlləsinə dəyişiklik edilməsi nəzərdə tutulur.
Dəyişiklik layihəsinə əsasən, əcnəbi və ya vətəndaşlığı olmayan şəxsin Azərbaycana qanunsuz gəlməsini, Azərbaycan ərazisində qanunsuz qalmasını, Azərbaycan ərazisindən qanunsuz tranzit keçidini və ya hər hansı şəxsin Azərbaycandan qanunsuz getməsini təşkil etməyə görə 4 min manatdan 8 min manatadək cərimə tətbiq olunur. Məlumat üçün bildirək ki, hazırkı qanunvericiliyə görə, bu məbləğ 2 min manatdan 5 min manatadəkdir.
Qeyd edək ki, dəyişiklik layihəsi Milli Məclisdə müzakirəyə çıxarılacaq.
Məsələ ilə bağlı fikir bildirən miqrasiya sahəsi üzrə ekspert Əvəz Həsənov "Bakı-Xəbər"ə açıqlamasında qeyd etdi ki, qanunsuz miqrasiya təşkil olunması mütəşəkkil cinayətkarlıq sayılır: "Dünyanın hər bir yerində qanunsuz miqrasiya təşkil edənlərə qarşı mübarizə aparılır. Qanunsuz miqrasiya işi ilə bəzi şəxslər məşğul olur. O şəxslər insanların miqrasiyasını təşkil edir. Bu cür dəstələr bütün ölkələrdə yüksək məbləğdə cərimə olunur. Bəzi hallarda bu işlə məşğul olanlar təkcə cərimələnmir, eyni zamanda onlara qarşı müəyyən cəzalar da tətbiq edilir. Bu səbəbdən də Azərbaycan hökumətinin qanunsuz miqrasiya təşkil edənlərə qarşı sərt mövqe sərgiləməsi düzgün addımdır".
Həmsöhbətimiz hesab edir ki, qanunsuz miqrasiya ilə bağlı qanunvericiliyin sərtləşdirilməsinə ehtiyac var: "Qanunsuz miqrasiya təşkil edənlərə qarşı cəzaların sərtləşdirilməsi gözlənilirdi. Bu sahədə müəyyən işlər görülüb. Sərhəd-nəzarət məntəqələri beynəlxalq standartlara uyğun olaraq təşkil edilib. Həmçinin, qeydiyyat sisteminə nəzarət gücləndirilir. Bundan əlavə, qaçaqmalçılıqla mübarizə aparılır".
Ə.Həsənovun sözlərinə görə, aldadılaraq ölkəyə gətirilən qanunsuz miqrantların hüquqları qanunvericilik tərəfindən qorunmalıdır.
Günel CƏLİLOVA
