Ənvər Fərəcov: "Belə işlərlə məşğul olanların həbs olunması..."
Azərbaycanda uşaq pornoqrafiyasını yayma, reklam etmə, satma, başqasına vermə, təklif etmə, əldə edilməsinə şərait yaratma, yaxud yaymaq və ya reklam etmək məqsədilə hazırlama, əldə etmə və ya saxlamaya görə cəza ağırlaşdırılır. Yayılan məlumata görə, bununla bağlı Cinayət Məcəlləsinə dəyişiklik təklif edilir. Sözügedən dəyişikliyə görə, bu işi görənlər azadlıqdan məhrumetmə ilə cəzalandırılacaq.
Hazırkı qanunvericiliyə əsasən isə, bu əməllərə görə 8 min manatdan 10 min manatadək miqdarda cərimə və ya 5 ilədək müddətə azadlıqdan məhrumetmə cəzası nəzərdə tutulur.
Bundan sonra isə artıq uşaq pornoqrafiyasını yayma, reklam etmə, satma, başqasına vermə, təklif etmə, əldə edilməsinə şərait yaratma, yaxud yaymaq və ya reklam etmək məqsədilə hazırlama, əldə etmə və ya saxlamaya görə 5 ilədək müddətə azadlıqdan məhrumetmə cəzasının tətbiq olunması təklif edilir. Layihə Milli Məclisin yaz sessiyasında müzakirəyə çıxarılacaq.
Son dəyişiklikdən də göründüyü kimi, layihə qəbul olunsa, bu işlə məşğul olanlar əvvəlki kimi yüksək məbləğdə cərimələnməyəcək, həbs olunaraq azadlıqdan məhrum ediləcək. Bununla bağlı cəzaların sərtləşdirilməsi, prinsipcə, belə işlərlə məşğul olanların sayının azalmasına təsir göstərəcək.
Maraqlıdır, bəs ekspertlərin buna yanaşması necədir?
Ekspert Ənvər Fərəcovun sözlərinə görə, sözügedən məsələ ilə bağlı cəzaların sərtləşdirilməsi təklifi təqdirəlayiqdir: "Həqiqətən də bununla bağlı cəzaların sərtləşdirilməsinə çox ehtiyac var. O üzdən, arzuolunandır ki, təkliflər qəbul edilsin. Bir növ, bu, indiki zamanın tələbidir. Məsələ ondadır ki, müasir dövr internet əsridir. Günümüzün reallığı belədir ki, uşaqlar da çox asanlıqla internetdən istifadə edir. Təkcə kompyuterlə deyil, telefonlarla da internetə daxil olmaq mümkündür. Bu da, necə deyərlər, uşaq pornoqrafiyasının yayılması, onun təbliğ olunması risqini artırır. Əvvəllər bu işlə məşğul olanlar cərimə ödəməklə özlərini xilas edirdi. Bu da, nəticə etibarilə, həmin şəxslərin yenidən belə neqativ işlərlə məşğul olmasına gətirib çıxarırdı. Ancaq belə işlərlə məşğul olanların həbs olunması, nə qədər olmasa da, onları bundan çəkindirəcək. Hesab edirəm ki, təkcə cəzaların sərtləşdirilməsi ilə kifayətlənmək olmaz. Bu istiqamətdə sistemli maarifləndirmə işinin aparılmasına da ehtiyac var. Xüsusən də məktəblərdə müəyyən işlər görülməlidir".
Vidadi ORDAHALLI
