Rasif Bağırov: "Bu gün Azərbaycan üçün problem olan süd vəzisi, ağ ciyər, mədə-bağırsaq traktının xərçəngidir"
Azərbaycanda onkoloji xəstəliklərlə xəstələnmə halları artıb. Açıqlanan statistik rəqəmlərə əsasən, Azərbaycanda 2011-ci ildə əhalinin hər 100 min nəfəri arasında onkoloji xəstəliklərlə xəstələnmənin göstəricisi 95,8 nəfər olub. 2012-ci ildə bu rəqəm 94,2-yə, 2013-cü ildə 97,5-ə, 2014-cü ildə 101,4-ə çatıb.
2015-ci ildə isə Azərbaycanda əhalinin hər 100 min nəfəri arasında onkoloji xəstəliklərlə xəstələnmənin göstəricisi 106,9 nəfər olub. Ötən il isə bu rəqəm bir qədər yüksəlib və əhalinin hər 100 min nəfərindən 108,5-ində onkoloji xəstəlik olub.
Onkoloji xəstəliklər nə səbəbdən artır? Bu xəstəliklərlə necə mübarizə aparılır?
Tibbi ekspert Rasif Bağırov bizimlə söhbətində qeyd etdi ki, onkoloji xəstəliklərin artmasında bir neçə amilin rolu olsa da, burada əsas yeri əhalinin qidalanma məsələsi tutur: "Onkoloji xəstələrin böyük bir qismi qeyri-onkoloji xəstəxanalarda qeydiyyatdadır. Qərb ölkələrində xərçəng xəstəliyinin müalicəsi ilə onkoloqlar məşğul olsalar da, cərrahi əməliyyatı cərrahlar edir. Biz Qərb dəyərlərinə üstünlük veririksə, bu məsələlərə yanaşma da fərqli olmalıdır".
Həmsöhbətimiz hesab edir ki, onkoloji xəstəliklərin artma səbəblərindən biri siqaretin təsiri, atmosferdə havanın korlanmasıdır. Onun sözlərinə görə, statistikaya əsasən, siqaret çəkən hər 20 nəfərdən birində xərçəngə tutulma risqi yaranır. Bütün dünyada onkoloji xəstəliklər get-gedə artır: "Onkoloji xəstəliklərin artmasının əsas səbəbi ətraf mühitin qlobal çirklənməsidir. Yəni burada söhbət küçənin, şəhərin və s. yerlərin çirklənməsindən yox, qlobal çirklənmədən gedir. Ətrafa kifayət qədər konsorogen maddələr xaric olunur. Ətraf mühitin çirklənməsində sənayenin təsiri var. İmkanlı və ağıllı ölkələr hətta zəhərli maddələrin istehsalını kənara çıxarır. Məsələn, heç bir Avropa ölkəsi konsorogen maddəli məhsulları öz ərazisində istehsal etmir". R.Bağırov onu da əlavə etdi ki, bu gün Azərbaycan üçün problem olan süd vəzisi, ağ ciyər, mədə-bağırsaq traktının xərçəngidir. Təəssüf ki, son zamanlar prostat xərçəngi də yayılmağa başlayıb.
Günel CƏLİLOVA
