Adil Qeybulla: "Havada toz qatının olması psixoloji problemlər yaradır və insanların əhval-ruhiyyəsinə ciddi təsir edir"
Martın 13-dən etibarən paytaxt Bakıda toz qatı müşahidə olunur. Ekologiya və Təbii Sərvətlər Nazirliyinin Ətraf Mühit üzrə Milli Monitorinq Departamentinin mütəxəssislərinin apardığı monitorinqlərin nəticələrinə əsasən, Bakıda və Abşeron yarımadasında havada olan tozun miqdarının sanitar normadan artıq olduğu müəyyən edilib.
Nazirliyin mətbuat xidmətinin rəhbəri İradə İbrahimovanın açıqlamasına əsasən, buna səbəb Ərəbistan səhralarında müşahidə olunan toz burulğanının atmosferin yuxarı təbəqələrinədək qalxmasıdır.
Bu toz hissəcikləri atmosfer axınları, əsasən də cənub, cənub-qərb axınları vasitəsilə Azərbaycana da gəlib: "Bildiririk ki, əlverişsiz meteoroloji şəraitlə bağlı 14 mart 2017-ci il tarixində atmosfer havasında tozun miqdarının bir qədər də artacağı və prosesin martın 15-dən zəifləyəcəyi ehtimal edilir".
Bakıda müşahidə edilən toz miqdarının normadan artıq olması nə kimi fəsadlar törədə bilər?
Məsələ ilə bağlı professor Adil Qeybullaya müraciət etdik.
O bizimlə söhbətində qeyd etdi ki, bu cür hava şəraitində müəyyən maskalardan istifadə olunmalıdır. Amma bizdə insanlar belə maskaları taxmaqda müəyyən kompleks yaşayır, özlərinə sığışdırmırlar: "Bu cür situasiyalarda qoruyucu maskalar heç olmasa mikroskopik hissəciklərin nəfəs yollarına düşməsinin qarşısını xeyli almış olur. Maskalar taxılmadığı halda xırda hissəciklər bronxlara düşür və qıcıqlanma yaradır. Tozların tərkibindən çox şey asılıdır".
Həmsöhbətimizin sözlərinə görə, xroniki bronxiti, asmoid komponentli xroniki bronxiti, bronxial astması, ağ ciyərlərində pnevmatoz xəstəliyi olan şəxslər belə havadan daha çox əziyyət çəkir. Çünki tüstü və toz birbaşa nəfəs yollarına təsir edir.
A.Qeybulla tozlu havanın ziyanlı olduğunu dilə gətirdi: "Bu cür toz qatı insanların ən əvvəl əsəb sisteminə təsir edir. Havada toz qatının olması psixoloji problemlər yaradır və insanların psixoloji durumu pozulur. Bu da insanların əhval-ruhiyyəsinə ciddi təsir edir. Pis hava, təbii ki, hamıya, xüsusilə də meteohəssas insanlara mənfi təsir edir. Xüsusən astma xəstəliyi və allergiyası olan insanlara dəyişkən hava müəyyən qədər problemlər yaradır. Gözlərlə bağlı yaz kataraktası deyilən bir xəstəlik var. Bu cür havaların belə xəstələrə də pis təsiri var. Bu adi hava şəraiti deyil. Ona görə insanlar ehtiyatlı olmalıdır".
Günel CƏLİLOVA
