Kəmalə Ağazadə: "Bağçaların sosial durumunun inkişaf etməsi üçün onlara maliyyə dəstəyi göstərmək lazımdır"
Martın 9-da Bakı və Sumqayıt şəhərlərinin yataqxanalarında müvəqqəti məskunlaşmış qaçqın və məcburi köçkün ailələrinin köçürülməsinə həsr olunmuş müşavirədə Azərbaycanın Birinci vitse-prezidenti Mehriban Əliyeva uşaq bağçalarının fəaliyyəti ilə bağlı fikirlərini bildirib.
"Hacıbala müəllim bağçalarla bağlı bir mövzuya toxundu. Bizim böyük toplantıdan sonra doğrudan da bu sahədə böyük işlər aparıldı, Bakı şəhərində, paytaxtın müxtəlif rayonlarında bir çox yeni uşaq bağçaları inşa olundu. Mən açılışlarda iştirak edirəm, lakin çox müasir, gözəl, rahat bağçalarda bəzi hallarda uşaqların sayı azdır. Yəni daha çox uşaq qəbul etməyə imkan var, amma maliyyə ilə bağlı olan problemlərə görə bağçalar tam gücü ilə çalışmırlar. Ona görə bu məsələni tezliklə həll etmək üçün Maliyyə Nazirliyi və Bakı Şəhər İcra Hakimiyyəti arasında işçi qrup yaradılmalı və bu məsələ qısa zamanda həllini tapmalıdır. Bununla da biz həm qənaət edəcəyik, yeni bağçalar tikməyə ehtiyac olmayacaq, həm də tələbatın bir qismini ödəyə biləcəyik", - deyə Birinci vitse-prezident qeyd edib.
Maliyyə Nazirliyi ilə Bakı Şəhər İcra Hakimiyyəti arasında yaradılacaq işçi qrupu bağçaların maliyyə problemlərinin həlli istiqamətində hansı tədbirləri reallaşdırmalıdır? Mövzu ilə bağlı ekspertə müraciət etdik.
Uşaq eksperti Kəmalə Ağazadə "Bakı-Xəbər"ə açıqlamasında qeyd etdi ki, bağçaların maliyyə vəziyyətinin normal olmaması hər kəsə bəlli idi: "Bu gün ölkədə kifayət qədər bağça istifadəyə verilib. O bağçaların, demək olar ki, hamısı müasir standartlara cavab verir. Ancaq həmin məktəbəqədər təhsil müəssisələrinə gələn uşaqların sayı azdır. Təbii ki, rəhbərlik gəlir əldə etmək üçün aylıq və ya illik haqqı yüksək məbləğ müəyyən edir. Uşaqların həmin bağçalara pulsuz yollanması üçün dövlət tərəfindən müəyyən işlər görülməlidir. Düzdür, ölkədə pulsuz bağçalar var".
K.Ağazadə ümid edir ki, Birinci vitse-prezident sayəsində bu məsələyə diqqət ayrılacaq. Müsahibimizin sözlərinə görə, bağçaların sosial durumunun inkişaf etməsi üçün onlara maliyyə dəstəyi göstərmək lazımdır. Aidiyyəti qurumların birgə səyi nəticəsində bağçaların maliyyə problemi həll oluna bilər.
Günel CƏLİLOVA
