"Bakı-Sumqayıt yolunda sərnişindaşıma qaydalarının necə pozulduğunu aidiyyəti qurumlar müşahidə edə bilərdi, məsuliyyəti bir-birinin üzərinə atmaq düzgün deyil"
Martın 9-da Bakıdan Sumqayıt istiqamətində gedən "Ford-Tranzit" markalı sərnişin mikroavtobusunun Masazır dairəsindəki körpünün üstündə daş maşınına çırpılması cərnişindaşıma qaydalarına necə riayət olunduğunu bir daha gündəmə gətirdi. Xatırladaq ki, Bakı-Sumqayıt yolunda baş verən dəhşətli yol qəzasında 5 tələbə ölüb, 21 nəfər yaralanıb.
Sərnişindaşıma sahəsində yaranmış vəziyyət barədə media nümayəndələrinə açıqlama verən Baş Dövlət Yol Polisi İdarəsinin mətbuat xidmətinin rəhbəri Kamran Əliyev qeyd edib ki, sərnişindaşıma qaydalarının pozulması hallarına qarşı Dövlət Yol Polisi əməkdaşları mütəmadi tədbirlər həyata keçirir, amma bu məsələyə digər qurumlar da nəzarət etməlidir: "Məlum qəzanı törədən mikroavtobus nəzarət postundan keçib. Lakin pik saatlar olduğundan, ola bilsin ki, əməkdaşlarımızın diqqətindən yayınıb. Çünki yol polisi təkcə sərnişin daşınmasına nəzarət etmir. O qədər qayda pozuntuları olur ki, həmin pozuntulara nəzarət olunan halda bir mikroavtobusun içərisində 2 nəfər artıq sərnişinin olması gözdən yayına bilər. Dayanacaqlarda sərnişinlərin minib-düşməsinə nəzarət olunmalıdır. Bununla bağlı aidiyyəti qurumlar var. Bu səlahiyyətlər yol polisi ilə yanaşı, digər əlaqədar qurumlara da həvalə olunub. Hazırda faktla bağlı cinayət işi başlanıb, istintaq gedir. Qaranlıq məqamlara istintaq aydınlıq gətirəcək".
Sosial sahə üzrə ekspert İlqar Hüseynli "Bakı-Xəbər"ə açıqlamasında qeyd etdi ki, məlum qəza hadisəsinin günahını bir qurumun üzərinə atmaq düzgün deyil: "Bakı-Sumqayıt yolunda baş verən qəza sadəcə qəza deyil, cinayət hadisəsidir. Sürücü 2012-ci ildən bəri 62 dəfə qayda pozub, 29 dəfə ödəyib. Nəzərinizə çatdırım ki, Bakı-Sumqayıt yolunda isə 2 DYP postu var. DYP xidməti yerinə yetirən yol polislərinin sayı da kifayət qədərdir. Keçmiş Nəqliyyat Nazirliyi, DYP və digər qurumlar Bakı-Sumqayıt yolunda mütəmadi reydlər keçirib. Həmçinin, həmin yolda təhlükəsizlik kameraları və radarların sayı da yetərincədir. Yəni həmin yolda sərnişindaşıma qaydalarının necə pozulduğunu aidiyyəti qurumlar müşahidə edə bilərdi. Məsuliyyəti bir-birinin üzərinə atmaq düzgün deyil".
Həmsöhbətimiz hesab edir ki, sərnişinlərin necə daşınmasına nəzarət olunmalıdır: "Qanunvericilikdə qeyd olunur ki, ayaq üstə sərnişinlərin daşınması qadağandır. Ancaq bu gün heç bir avtobusun oturacaqları dolandan sonra hərəkətə keçməsini görməmişik. Gərək avtobus sərnişinlə dolsun ki, sonra həmin nəqliyyat vasitəsi hərəkət etsin".
Günel CƏLİLOVA
