Ruayan şəhər meriyasının və Azərbaycanın Dostları Assosiasiyasının təşkilatçılığı, Azərbaycanın Fransadakı səfirliyinin və Paris Azərbaycan Evinin dəstəyilə Ruayan şəhərində Novruz bayramı münasibətilə silsilə tədbirlər davam etdirilib.
Şəhər meri Didye Kantən Azərbaycanın Fransadakı səfiri Elçin Əmirbəyov, Azərbaycanın Dostları Assosiasiyasının prezidenti, Fransa parlamentinin üzvü Jan-Fransua Mansel və Paris Azərbaycan Evinin rəhbəri, Azərbaycanın Dostları Assosiasiyasının baş katibi Mirvari Fətəliyevanı şəhər meriyasında qəbul edib.
Səfir Elçin Əmirbəyov Azərbaycanın Fransa ilə əməkdaşlığa böyük önəm verdiyini qeyd edərək, ölkəmizin mədəniyyətinə göstərilən diqqət üçün bütün meriya əməkdaşlarına təşəkkür edib. O, həmçinin, Fransanın müxtəlif şəhərləri ilə dostluq və qardaşlıq sazişlərinin imzalandığını qeyd edib, eləcə də Ermənistan-Azərbaycan, Dağlıq Qarabağ münaqişəsinin həllində Minsk Qrupunun üzvü olan Fransanın rolundan danışıb.
Daha sonra Ruayan şəhərinin Konqreslər Sarayında Azərbaycanda turizmə dair film nümayiş etdirilib. Tədbiri açan mer D.Kantən Azərbaycan nümayəndə heyətini Ruayanda görməkdən şad olduğunu qeyd edərək, iki ölkə arasında müxtəlif sahələrdə əlaqələrin inkişafından bəhs edib.
J.F Mansel Azərbaycanın Dostları Assosiasiyasının fəaliyyəti, Azərbaycanın tanıdılması üçün Fransanın müxtəlif regionlarında hər il bu kimi silsilə tədbirlərin uğurundan, eləcə də assosiasiyanın Azərbaycanı kəşf etmək məqsədilə fransızlar üçün təşkil etdiyi səyahətlərdən danışıb.
Səfir Elçin Əmirbəyov isə Novruz bayramı haqqında məlumat verərək bildirib ki, bu bayram azərbaycanlılar üçün mühüm əhəmiyyət kəsb edir. Birgə yaşayışı, sülhü təbliğ edən Novruz bayramının həm də 2010-cu ildən etibarən BMT tərəfindən beynəlxalq bayram elan edildiyinə diqqət çəkən səfir daha sonra Azərbaycanda multikulturalizm barədə məlumat verib.
Tədbirin sonunda xalq artisti Yusif Qasimovun rəhbərlik etdiyi "Bakı ulduzları" rəqs ansamblı konsert proqramı ilə çıxış edib. Azərbaycan rəqslərini 400-dən çox tamaşaçı böyük maraqla izləyib.
Baki-xeber.com
