Şəfa Mehmanqızı: "Avtobus "20 Yanvar" - Sumqayıt istiqamətində qanunsuz fəaliyyətdə olub"
Mais Ağayev: "Sözügedən mikroavtobus heç bir marşrut xətti üzrə qeydiyyatda olmayıb"
Ərşad Hüseynov: "20 Yanvar" metrostansiyasının ətrafında Bakı-Sumqayıt yolunun sürücüləri nə hoqqalardan çıxır, hamı bunu gözəl bilir"
Ötən gün Bakı-Sumqayıt yolunda dəhşətli yol-qəza hadisəsi baş verib. Hadisə nəticəsində dərsə tələsən 5 tələbə "yol terroru"nun qurbanına çevrilib. Məlumat üçün bildirək ki, Bakıdan Sumqayıt istiqamətində gedən "Ford-Tranzit" markalı sərnişin mikroavtobusu Masazır dairəsindəki körpünün üstündə daş daşıyan maşına çırpılıb. Hadisə nəticəsində 5 tələbə ölüb, 21 nəfər yaralanıb. Yaralılardan ikisinin vəziyyətinin ağır olduğu bildirilir.
Artıq Bakıdan Sumqayıt istiqamətində gedərkən qəza törətmiş "Ford-Tranzit" markalı sərnişin mikroavtobusunun sürücüsü, Sumqayıt şəhər sakini, 1976-cı il təvəllüdlü Hüseynov Namiq Hüseyn oğlu da saxlanıb.
Qeyd edək ki, qəzada ölənlərin hamısı Sumqayıt Dövlət Universitetinin tələbəsidir. Sumqayıt Dövlət Universitetindən mətbuata verilən məlumatda bildirilir ki, ölənlər aşağıdakı şəxslərdir:
Nəsibov İbrahim Xəqani oğlu (1996-cı il);
Muradova Roza Eynulla qızı (1997-ci il);
Quliyev İbrahim Vüqar oğlu (1996-cı il);
Caniyev Rəşad Füzuli oğlu (1997-ci il);
Quliyeva Çinarə Azər qızı (1996-cı il).
"Ford Tranzit" markalı mikroavtobus 16 nəfər sərnişin üçün nəzərdə tutulub. Ancaq ötən gün baş vermiş bədbəxt hadisə nəticəsində mikroavtobusda 28 sərnişin olub. Səhiyyə Nazirliyinin açıqlamasına görə, hadisə zamanı avtobusda ümumilikdə 28 nəfər olub.
Hazırda hər kəs "necə olur ki, 16 nəfərlik avtobusdan 5 ölü, 21 yaralı çıxır" - deyə suallar səsləndirir. Həmçinin, bu nəqliyyat vasitəsinin hərəkətinə icazə verilibmi?
Ekspertlər təklif edir ki, bu tip nəqliyyat vasitələri ya dövlətə verilsin, ya da tender vasitəsilə özəl şirkətə.
Dövlət Avtomobil Nəqliyyatı Xidmətinin (DANX) İctimaiyyətlə əlaqələr şöbəsinin rəhbəri Şəfa Mehmanqızı "Bakı-Xəbər"ə açıqlamasında bildirdi ki, ötən gün səhər Bakı-Sumqayıt yolunda insan tələfatı ilə nəticələnən qəzaya səbəb olan mikroavtobus qanunsuz fəaliyyət göstərib: ""Avtobus "20 Yanvar" - Sumqayıt istiqamətində qanunsuz olaraq fəaliyyətdə olub. Ona görə də proses Dövlət Yol Polisi İdarəsi tərəfindən araşdırılır və ekspert rəyindən sonra açıqlama veriləcək. Dövlət Avtomobil Nəqliyyatı Xidməti tərəfindən həmin mikroavtobusa fərqlənmə nişanı və marşrut kartı verilməyib".
Bakı Nəqliyyat Agentliyinin İctimaiyyətlə əlaqələr şöbəsinin sektor müdiri Mais Ağayev də sözügedən mikroavtobusun heç bir marşrut xətti üzrə qeydiyyatda olmadığını bildirdi.
Nəqliyyat məsələləri üzrə ekspert Ərşad Hüseynovun sözlərinə görə, Bakıdan Sumqayıta və əks istiqamətdə sərnişin aparan nəqliyyat vasitələrinin əksəriyyəti yük maşınlarıdır: "Həmin avtomobillərin əksəriyyəti yük avtomobilləridir. Bundan əlavə, sürücülər həmin maşınlarda özbaşına konstruksiya dəyişikliyi ediblər. Hətta elələri var ki, həyasızcasına həmin yük avtomobilinin qeydiyyat şəhadətnaməsini cibində gəzdirir. O şəhadətnamədə yük avtomobili yazılıb, amma sərnişin daşıyır. Hətta sərnişindaşıma üçün nəzərdə tutulan avtomobillərin də əksəriyyətində konstruksiya dəyişikliyi edilir. O maşını zavod 13, 15 nəfərlik buraxır. Amma düzürlər oturacaqları və 18, 20 və daha artıq adam aparırlar. Konstruksiyaları da dəyişildiyi üçün, həmin maşınlar qəzaya düşəndə ölü və yaralı sayı bir az da artır. Mikroavtobusda istehsalçının müəyyən etdiyi sayda oturacaqlar olmalıdır. Oturacaqlar təhlükəsizlik kəməri ilə təchiz edilmiş olmalıdır. Belə olan halda, qəzanın nəticələri minimuma enir. Amma yoxdur bu. Olmadığı üçün də belə faciələr yaranır".
Ə.Hüseynovun sözlərinə görə, bu özbaşınalıq illərdir davam edir: "Bu, faciədir, özbaşınalıqdır. Bu, illərdir davam edən vəhşilikdir. Buna göz yumulur. Hətta nəinki göz yumulur, buna şərait də yaradılır. Bakı-Sumqayıt arasında bu daşımalar uzun müddətdir davam edir. "20 Yanvar" metrostansiyasının ətrafında Bakı-Sumqayıt yolunun sürücüləri nə hoqqalardan çıxır, hamı bunu gözəl bilir.
Aidiyyəti qurumlar vaxtilə buna nəzarət etməli idi. Çünki bu tip daşımalara görə məsul olan qurum Nəqliyyat Nazirliyidir. Daha sonra buna polis nəzarət etməlidir. Təkcə DYP yox, polisin bütün xidmətləri.
"20 Yanvar" ətrafında Bakı-Sumqayıt yolunda "meymunluq" edənlər hətta özlərinə qanunsuz avtovağzal da yaradıb. Oradan da işləyirlər. Şəxsən mən bunun dəfələrlə şahidi olmuşam. Yığışdırılması üçün müraciət etmişəm. Mətbuatda işıqlandırmışam. Onlarda nəinki sürücülük, heç insanlıq əlamətləri yoxdur. Kamikadze kimi aparırlar özlərini. Nəticəsi də göz qabağındadır".
Təbii ki, qəzaya səbəb olan mikroavtobusun sürücüsü N.Hüseynov saxlanıb. Ancaq unutmaq lazım deyil ki, o mikroavtobus hansısa sahibkara məxsusdur. Sürücü hər günün sonunda o sahibkara günlük plan verib. Sahibkar üçünsə sürücünün o mikroavtobusu necə və hansı şəraitdə idarə etdiyi önəmli deyildi. Yaxşı olar ki, sürücü ilə yanaşı, həmin mikroavtobusun sahibi də məsuliyyətə cəlb olunsun.
Günel CƏLİLOVA
