8 Mart Beynəlxalq Qadınlar bayramı münasibəti ilə Nəsimi rayon İcra Hakimiyyəti bayram tədbiri təşkil edib.
Nəsimi RİH-dən baki-xeber.com-a verilən xəbərə görə, tədbirdə rayonun ictimai-siyasi həyatında fəal iştirak edən, dövlət, elm və təhsil, səhiyyə, mədəniyyət və digər sahələrdə çalışan, həmçinin şəhid ailələrini təmsil edən qadınlar iştirak edib. Bayram tədbirini Nəsimi rayon İcra Hakimiyyətinin başçısı Asif Əsgərov açaraq, iştirakçıları gözəl bayram münasibətilə təbrik edib, 8 Mart Beynəlxalq Qadınlar gününün tarixi barədə məlumat verib.
A.Əsgərov müasir dövrümüzdə Azərbaycan qadını ölkənin ictimai-siyasi həyatında fəal rol oynadığına diqqət çəkərək deyib:”Bu gün Azərbaycanın Birinci vitse-prezidenti, Heydər Əliyev Fondunun Prezidenti, YUNESKO və İSESKO-nun xoşməramlı səfiri Mehriban xanım Əliyeva bütün dünyaya sübüt edir ki, Azərbaycan qadını həm gözəl ana, həm də fəal ictimai xadim ola bilər. Atalar gözəl deyib: «Kişi evin dirəyidirsə, qadın evin çırağıdır». Məhəmməd Peyğəmbər isə Cənnətin anaların ayağı altında olduğunu buyurub. Ana dünyada ən müqəddəs varlıqdır. Ona görə də biz ana vətən, ana torpaq deyirik. Böyük Vətən müharibəsi illərində qadınlarımız kişilərlə bərabər böyük qəhrəmanlıq və fədakarlıq göstərərək qələbənin əldə olunmasında böyük əmək, qüvvə və bacarıq sərf etmişlər. Müstəqilliyimizin ilk illərində Qarabağ döyüşlərinin ön səngərlərində qəhrəmanlıqla vuruşan qadınlarımızla fəxr edirik. Müasir dövrdə Azərbaycan qadını inkişaf etmiş sivil ölkələrin qadınlarından heç nə ilə geridə qalmır, hətta elmin bir sıra sahələrində öndə gedir. 1998-ci ildə Ulu öndərimiz Heydər Əliyevin sərəncamı ilə Azərbaycanda Qadın Problemləri üzrə Dövlət Komitəsi yaradılmışdır.
Azərbaycan həm də Avropa Şurasının qadınlarla bağlı bürosunda təmsil olunur, BMT-nin Qadın məsələləri üzrə komissiyasının tam hüquqlu üzvüdür. 1995-ci ildə isə ölkəmiz Qadınlara qarşı münasibətdə ayrı-seçkiliyin bütün formalarının aradan qaldırılması haqqında Beynəlxalq Konvensiyaya qoşulmuşdur. Azərbaycan qadını həm həkim, həm müəllim, həm memar, həm dövlət qulluqçusu, həm hərbiçi, həm ictimai-siyasi xadim, həm də qayğıkeş bir ana, vəfalı həyat yoldaşıdır. Respublikamızın bir çox sahələrində çalışanların böyük bir hissəsini qadınlar təşkil edir”.
Bakının Nəsimi rayonunda əhalinin 50,5 faizini qadınların təşkil etdiyini bildirən RİH başçısı təhsil, səhiyyə, mədəniyyət, elm və digər sahələrində çalışan qadınlarımız öz bilik və bacarıqları, işgüzarlıqları və rayonun ictimai-siyasi həyatındakı fəaliyyətlərilə hər zaman seçildiklərini xüsusi qeyd edib və onların fəaliyyətinin ölkə rəhbərliyi tərəfindən yüksək qiymətləndirildiyini bildirib.
Tədbirdə iştirak edən qadınlara Rayon İcra Hakimiyyətinin hədiyyələri təqdim olunub. Tədbir populyar incəsənət ustalarının konserti ilə başa çatıb.
