Adil Qeybulla: "Vətəndaşlar bu mərkəzdən rahat və güvənli şəkildə istifadə edəcək"
Könül Xəlilova: "Ötən müddət ərzində bu mərkəz nəinki ölkəmizdə, hətta beynəlxalq qurumlar tərəfindən də qabaqcıl bir tibb müəssisəsi kimi tanınıb"
Xəbər verildiyi kimi, martın 6-da Respublika Müalicəvi Diaqnostika Mərkəzinin nəzdində "Ürək Mərkəzi"nin açılışı olub. Açılış mərasimində iştirak edən Prezident İlham Əliyev bildirib ki, "Ürək Mərkəzi" müasir standartlara cavab verir:
"Deyə bilərəm ki, dünya səviyyəsində ən yüksək qiymətə layiq olan bir mərkəzdir. Həm bunun tikintisi, həm daxili dizaynı, əlbəttə ki, avadanlığı, müasir texnologiyalar, hər şey burada ən yüksək səviyyədə təşkil olunub".
"Ürək Mərkəzi"nin fəaliyyətə başlaması ilə bağlı ekspertlərə müraciət etdik.
Respublika Müalicəvi Diaqnostika Mərkəzinin baş həkimi Könül Xəlilovanın sözlərinə görə, beş il əvvəl - 2011-ci il dekabrın 27-də ölkə başçısı İlham Əliyevin xeyir-duası ilə Respublika Müalicəvi Diaqnostika Mərkəzi fəaliyyətə başlayıb: "Ötən müddət ərzində bu mərkəz nəinki ölkəmizdə, hətta beynəlxalq qurumlar tərəfindən də qabaqcıl bir tibb müəssisəsi kimi tanınıb. Respublika Müalicəvi Diaqnostika Mərkəzi Amerika Birləşmiş Ştatlarının qızıl sertifikatına layiq görülüb, mərkəzi laboratoriyası isə beynəlxalq İSO sertifikatını alıb".
Professor, tibbi ekspert Adil Qeybulla "Bakı-Xəbər"ə açıqlamasında qeyd etdi ki, xarici ölkələrdə də bu tip mərkəzlər açılır: "Xatırladım ki, Sovet dönəmində Azərbaycanda Eksperimental Cərrahiyyə İnstitutu var idi. Orada ürək cərrahlığı şöbəsi olub. Ancaq o vaxt ayrıca bir mərkəz yox idi. "Ürək Mərkəzi"nin olması təmərküzləşməsi deməkdir. Bu o demək deyil ki, ayrı-ayrı klinikalarda kardiologiya mərkəzləri fəaliyyət göstərməyəcək. Onlar da fəaliyyət göstərəcək. Bu mərkəzlərin çox olması müsbət haldır".
Həmsöhbətimizin sözlərinə görə, "Ürək Mərkəzi"nin vətəndaşlara xeyri olacaq. Vətəndaşlar bu mərkəzdən rahat və güvənli şəkildə istifadə edəcək. "Ürək Mərkəzi"ndə çalışan şəxslərin öz işinin peşəkarı olması insanları daha da sakitləşdirəcək. Günel CƏLİLOVA
