Yusif Bəkirov: "Bəzi şəxslər məsuliyyətdən yayınmaq üçün narkotik maddələrin istifadəsi və satışına uşaqları cəlb edir"
Ötən il ərzində narkotik vasitələrin qanunsuz dövriyyəsi ilə məşğul olduğu üçün 2607 nəfər cinayət məsuliyyətinə cəlb olunub. Bu, Narkomanlığa və Narkotik Vasitələrin Qanunsuz Dövriyyəsinə Qarşı Mübarizə üzrə Dövlət Komissiyasının İşçi Qrupu tərəfindən hazırlanmış "Narkotiklərə nəzarət sahəsində 2016-cı ilə dair Ölkə Məruzəsi"ndə əksini tapıb.
Onlardan 5 nəfəri 18 yaşadək, 176 nəfəri 18-25 yaşadək, 412 nəfəri 26-29 yaşadək, 2014 nəfəri 30 yaşdan yuxarı, 22 nəfəri fəhlə, 6 nəfəri qulluqçu və ya maddi məsul şəxs, 3 nəfəri təsərrüfat işçisi, 1 nəfəri ali məktəb tələbəsi, 2331 nəfəri işləməyənlər, 2570 nəfəri kişilər, 37 nəfəri qadınlar, 907 nəfəri əvvəllər cinayət törətmişlər, 21 nəfəri isə əvvəllər xüsusi qeydiyyatda olanlardır.
Narkotik vasitələrin qanunsuz dövriyyəsi ilə bağlı ötən il 18 yaşadək olan 5 nəfərin məsuliyyətə cəlb olunmasına fikir bildirən Uşaq Hüquqları Müdafiə Liqasının sədri Yusif Bəkirov bizimlə söhbətində qeyd etdi ki, uşaqların narkotik satışı ilə məşğul olması acı faktdır: "O uşaqlar aldadılaraq bu işə cəlb olunub. Bəzi şəxslər məsuliyyətdən yayınmaq üçün narkotik maddələrin istifadəsi və satışına uşaqları cəlb edir. Belə cinayətkarlar müəyyən vasitələrlə uşaqları ələ alır və onların köməyindən istifadə edərək, faktiki, cinayət məsuliyyətindən qaçmaq istəyir. Bəllidir ki, satış məqsədi olmadan narkotik vasitələrdən istifadə edərlərsə, həmin şəxslər 3 ilə qədər cəzalandırılır. Satış məqsədilə, yaxud qanunsuz olaraq bu maddələrin saxlanması, əldə edilməsi, hazırlanması kimi hallarda 7 ilədək azadlıqdan məhrum etmə ilə cəzası nəzərdə tutulur. Cinayətin əhatəsindən və ağırlığından asılı olaraq, cəza müddəti də artırılır. Lakin görürsən ki, yenə də narkotik maddələrin istifadəsi, daşınması, İran ərazisindən gətirilməsi, cənub zonasında marixuananın əkilməsi kimi hallara tez-tez rast gəlinir. Beləliklə, həmin şəxslər həbs olunur. Çox zaman olur ki, narkobaronlar, cinayətkar qrupun başında dayananlar həbs olunmur. Ancaq ortada vasitəçi olanlar, çox zaman işdən xəbərsiz olanlar məsuliyyətə cəlb olunur. Hesab edirəm ki, məktəblərdə, kütləvi informasiya vasitələrində bununla bağlı maarifləndirmə daha güclü olmalıdır. İnsanlar daha çox məlumat əldə etməlidir".
Həmsöhbətimizin fikrincə, narkotik istifadəçilərinə deyil, bunu satan şəxslərə qarşı ciddi tədbirlər görülməlidir.
Günel CƏLİLOVA
