Ənvər Fərəcov: "Belə hallara qarşı təkcə polis orqanları mübarizə aparmalı deyil"
Yeniyetmələrin narkomaniya xəstəliyinə düçar olması hazırkı dövrün ən aktual məsələsidir. Birincisi, ona görə ki, narkotiklərdən ilk istifadənin əksər halları məhz bu yaş dövründə baş verir. İkincisi, narkotik vasitələr inkişafda olan orqanizmə məhvedici təsir göstərir. Statistik araşdırmalar göstərir ki, bu bəlaya düçar olanların bir çoxu 15-17 yaş arasındadır.
Narkomaniya asılılığın ən ağır növüdür. Bu gün bir çox valideynlər belə hesab edir ki, övladlarının xoşbəxt olması üçün onları maddi cəhətdən təmin etmək, eləcə də onun həyatından istisnasız olaraq bütün çətinlikləri çıxarmaq lazımdır. Lakin uşağı, ilk növbədə, tərbiyə etmək, ona diqqət ayırmaq, onun şəxsiyyətinə səmimi maraq göstərmək, onun həyatında iştirak etmək daha vacibdir.
Bu arada gəzən söz-söhbətlərə görə, Bakıdakı bəzi çayxanalarda, kafelərdə çaya az miqdarda narkotik qatılır. Nəticədə bu, mərhələ-mərhələ xüsusən yeniyetmə gənclər arasında asılılıq yaradır. Bu minvalla onlar sonrakı dövrdə narkotik aludəçisinə çevrilir. Bununla yanaşı, belə şayiələr gəzir ki, qəlyanxanalarda da qəlyana narkotik qatılır. Belə ki, bu zaman gənclərin narkotikə aludə olma risqi daha böyükdür. Həmçinin, belə söhbətlər var ki, şəhərdəki məktəblərin həndəvərlərində uşaqlarda narkotik asılılığına gətirib çıxara biləcək həblər satılır. Belə ki, həmin həblər uşaqlarda müəyyən alışqanlıq, vərdiş yaradır.
Ümumən bu kimi hallara qarşı necə mübarizə aparılmalıdır? Məsələyə münasibət bildirən ekspert Ənvər Fərəcovun fikrincə, belə xoşagəlməz hallar potensial təhlükə mənbəyidir: "Ona görə də belə hallara qarşı sistemli mübarizə aparılmalıdır. Yəni təkcə müvafiq dövlət orqanları yox, cəmiyyətin bütün təbəqələri buna həssas yanaşmalı və son dərəcə ayıq-sayıq olmalıdır. Belə məlumatlar varsa, dərhal müvafiq orqanlara müraciət edilməlidir. Belə hallara qarşı təkcə polis orqanları mübarizə aparmalı deyil. Valideynlər, müəllimlər, QHT-lər də fəal olmalıdır. Davamlı olaraq maarifləndirmə işi aparılmalıdır. Valideynlər uşaqların təlim-tərbiyəsinə ciddi fikir verməli, uşaqda hər hansı qeyri-adi bir hərəkət müşahidə edəndə dərhal tədbir görməlidir. Çünki uşaqların, yeniyetmələrin narkomaniyaya qurşanması çox vaxt çayxana, bar, diskoteka, qəlyanxana və digər bu kimi əyləncə mərkəzlərindən başlayır. Sonradan bu çox ciddi fəsadlara gətirib çıxarır". Vidadi ORDAHALLI
