Novruz çərşənbələri artıq üçüncü həftədir qeyd edilir. Novruza qədərki mərhələni əhatə edən çərşənbələrin hərəsinin öz mənası və funksiyası var.
Azərbaycan mədəniyyətində, adət-ənənələr sistemində, həyat tərzində çox əlamətdar hadisələr var ki, onlar bizim dünyagörüşümüzün formalaşmasında mühüm əhəmiyyət daşıyır. Təbiət öz ecazkarlığı ilə hər zaman bizi təəccübləndirib, fəsillərin bir-birini əvəz etməsi ahəngi insanlara çox şeylər anladıb.
Maraqlıdır ki, hər fəslin öz gözəlliyi, öz dəyəri, öz əhəmiyyəti olduğu kimi, öz ayin və mərasimləri, bayramları da mövcuddur. Elə bir fəsil yoxdur ki, onun öz mərasimi, ayini olmasın. Ola bilər ki, bir zamanlar mərasimlərin, bayramların sayı daha çox olub, sonralar sadəcə müxtəlif məsələlər üzündən onların sırasında seyrəlmə müşahidə edilib.
Keçən iki çərşənbə haqqında sizə məlumat vermişdik. Birinci çərşənbə "Əzəl çərşənbə", ikinci çərşənbə "muştuluqçu", "müjdəverən" çərşənbədir.
Bu gün isə üçüncü çərşənbədir. Bu günə el arasında "Gül çərşənbə" deyilir. Professor Məhərrəm Qasımlı qəzetimizə bildirdi ki, "Gül çərşənbə" xalq tərəfindən xüsusi şəkildə qeyd edilir. Bu çərşənbədə ev-eşik, həyət-baca təmizlənir. Eyni zamanda, rəhmətə gedənlərin ruhu xatırlanıb qəbir üstünə gedilir. Üçüncü çərşənbəyə qədim çağlardan indiyə qədər həm də "ölü çərşənbəsi" və ya "ata-baba günü" də deyilir.
İradə SARIYEVA
