"Narkotik istifadəçilərini həbs etmək yox, müalicə etmək lazımdır, müalicənin effektli və səmərəli təşkil olunması çox vacibdir"
"Azərbaycanda həbs olunanlardan 7 nəfərdən biri Cinayət Məcəlləsinin 234-cü (qanunsuz olaraq narkotik vasitə əldə etmə) maddəsi ilə ittiham olunur". Bunu Məhkəmə Hakimləri Assosiasiyaları İttifaqının ümumi yığıncağında Ali Məhkəmənin Cinayət Kollegiyasının sədri Şahin Yusifov media nümayəndələrinə açıqlamasında deyib.
O bildirib ki, hakimlər bu cür məsələlərdə diqqətli olmalıdır: "Ən bəlalı məsələlərdən biri Cinayət Məcəlləsinin 234.1-ci maddəsi ilə bağlıdır. Bu gün azadlıqdan məhrum etmə cəzası çəkənlərin 7 nəfərdən biri bu maddə ilə ittiham olunmuş şəxslərdir. Cəzaçəkmə müəssisələri, istintaq təcridxanaları bu maddə ilə cəza çəkən şəxslərlə doludur. Üç gün əvvəl 65 məhkum bizə müraciət edib. Onlar da fərmanları oxuyurlar, görürlər ki, Prezidentin mövqeyi məhkumların vəziyyətinin humanistləşməsinə yönəlib. Onlar xahiş edirlər ki, azad olunmalarına yardım göstərilsin. Bəziləri bildirir ki, qanunsuz yerə məhkum olunublar. Biz də baxılmış işləri təhlil edəndə görürük ki, polislər yenə də plan doldurmaqla məşğuldur. Cinayət təqibi orqanlarını başa salmalıyıq ki, belə olmaz. Narkomandırsa, narkotik dövriyyəsi ilə məşğuldursa, məsuliyyətə cəlb olunsun. Əgər əvvəllər dəfələrlə məhkum olunubsa və həmişə "kalpak" altında saxlanırsa ki, lazım olanda həbs olunsun, bu düzgün deyil. Nəyə lazımdır bu? Mən hakimlərdən xahiş edirəm diqqətlə yanaşsınlar buna. Qanunsuz azadlıqdan məhrum etmə hallarına yol verilməsin. Bəli, əvvəlki illərlə müqayisədə bu məsələdə müəyyən dönüş var. Bəraət hökmləri var və biz bunu alqışlayırıq. Lakin hakimlər hər zaman cəsarətli olmurlar. Qanunsuz, əsassız hökm çıxarmaq olmaz. Əsaslı hökmlərin çıxarılmasına nail olun".
Məsələ ilə bağlı fikir bildirən Ədliyyə Nazirliyi yanında Penitensiar Xidmətə Nəzarət İctimai Komitəsinin üzvü Əliməmməd Nuriyev "Bakı-Xəbər"ə açıqlamasında qeyd etdi ki, həbs olunanlardan 7 nəfərdən birinin narkotik əldə etməsi ilə ittiham olunması böyük rəqəmdir: "Bəllidir ki, Cinayət qanunvericiliyinin konsepsiyası dəyişir. 234.1 maddəsi ilə bu tip əməllərə görə cinayət məsuliyyəti nəzərdə tutulmuşdu. Həmin maddə ilə bağlı təkliflər hazırlanır. Bu o deməkdir ki, həmin şəxslər xəstə olduqları üçün müalicəyə ehtiyacı var. Onları həbs etmək yox, müalicə etmək lazımdır. Müalicənin effektli və səmərəli təşkil olunması çox vacibdir. Yaxşı olar ki, narkotik maddələrdən asılılıqla bağlı bir mərkəz yaradılsın. Artıq hökumət bu istiqamətdə addımlar atmağa hazırlaşır. Məndə olan məlumata görə, tibbi elmi əsaslar üzrə həmin şəxslərin müalicəsi ilə bağlı mərkəz açılacaq. Bu mərkəzin Daxili İşlər Nazirliyinin nəzdində olması daha məqsədəuyğundur. Çünki bu tip cinayətlərin istintaqını daha çox DİN aparır".
Günel CƏLİLOVA
