Könül Vaqifqızı: "10-12 yaşlı yeniyetmələrə internetin zərərli tərəflərini başa salmaq o qədər də asan deyil"
Azərbaycanda internet klublarda uşaqlar üçün xüsusi kompyuterlərin ayrılması və buna əməl etməyən klub rəhbərlərinin inzibati məsuliyyətə cəlb edilməsi təklif edilir.
Ailə, Qadın və Uşaq Problemləri üzrə Dövlət Komitəsinin Hüquqi təminat şöbəsinin müdir müavini Seymur Məmmədov media nümayəndələrinə açıqlamasında bildirib ki, bu məsələ komitə tərəfindən uşaqların internetdə qarşılacağı zərərli informasiyalardan qorunması məqsədilə yeni hazırlanmış "Uşaqların sağlamlığı və inkişafına ziyan vuran informasiyalardan qorunması haqqında" qanun layihəsinə daxil edilib. Onun sözlərinə görə, layihədə internet klublarında uşaqlar üçün ayrıca guşənin yaradılması məsələsi öz əksini tapıb: "Layihəyə görə, hər bir internet klubda 2 kompyuter olmaq şərtilə, süzgəcdən keçirilmilş kompyuterlər olmalıdır. İnternet klubda internetdən istifadə etmək istəyən uşaqlar həmin kompyuterlərdə əyləşdirilməlidir. Buna nəzarət edəcək qurum tərəfindən mütəmadi olaraq monitorinqlər həyata keçiriləcək. Monitorinq zamanı internet klubda uşağın süzgəcdən keçirilmiş kompyuterdə deyil, digər kompyuterdə əyləşdiyi aşkarlanarsa, onda klub rəhbərliyinin məsuliyyətə cəlb edilməsi nəzərdə tutulub".
Qeyd edək ki, layihənin tezliklə Milli Məclisə təqdim edilməsi nəzərdə tutulur.
Psixoloq Könül Vaqifqızı bizimlə söhbətində bildirdi ki,
hazırda bir çox valideynlər övladlarının internet asılılığından şikayət edir: "10-12 yaşlı yeniyetmələrə internetin zərərli tərəflərini başa salmaq o qədər də asan deyil. Uşaqlara internetin ziyanlı tərəflərini başa salmaq çətindir. Düzdür, başa düşənlər olur, amma uşaq olduqları üçün, kompyuter oyunları onlar üçün maraqlıdır. Buna görə də uşağa oyun oynamamağın yaxşı tərəflərini başa salmaq çətindir".
Həmsöhbətimizin sözlərinə görə, bəzi valideynlər özləri bilərəkdən uşaqlarını internet klublara göndərir. Valideyn internet klubda uşağın onun yaşına uyğun olmayan hansı oyunları oynayacağından və ya onun tərbiyəsinə, psixologiyasına mənfi təsir göstərən müxtəlif növ materiallarla tanış olacağından xəbərsizdir. Bu səbəbdən də internet klublarda məktəb yaşlı uşaqlar üçün xüsusi kompyuterlərin qoyulması məqsədəuyğundur. İnternet klubun rəhbəri bu qaydaya əməl etməzsə, həmin şəxs müxtəlif formada cəzalandırılmalıdır. Belə olarsa, valideyn də rahat olar ki, onun övladı internet klubda hər hansı bir xoşagəlməz materialla tanış olmayacaq".
Günel CƏLİLOVA
