Bahadur Bilalov: "Bazar iqtisadiyyatında hansısa tənzimlənmiş qiymətdən söhbət gedə bilməz"
Bu gün ölkəmizdə gözoxşayan 4 və 5 ulduzlu otellərimiz yetərincədir. Tək paytaxt ərazisində deyil, istirahət bölgələrində də otellərimiz turistlərin ixtiyarına verilib. Ancaq bəzi otellərdə turistlərin sayı çox olanda mehmanxanalar bilərəkdən qiyməti qaldırır. Bu faktı Azərbaycan Turizm Assosiasiyası da təsdiq edir. Assosiasiyanın sədri Nahid Bağırov media nümayəndələrinə açıqlamasında bildirib ki, Azərbaycanda otellərin qiymət siyasətinin nizamlanması mexanizmini yaratmaq lazımdır.
O təəssüf hissilə deyib ki, bir sıra otellərimiz turist axını ilə üzləşəndə qiymətləri qaldırmağa başlayır. Bu böyük problemdir, çünki bu otellərə görə bütün turizm sektoru ziyan görə bilər.
N.Bağırov bildirib ki, Gürcüstan, eləcə də digər ölkələr belə hallarda qiymətləri azaldır: "2015-ci ildə Azərbaycanda bir sıra biznes növləri, eləcə də turizm fəaliyyəti ilə məşğul olan şirkətlər üçün lisenziya ləğv olunmuşdu. N.Bağırovun fikrincə, bu, turizmin inkişafını stimullaşdırsa da, digər tərəfdən, lisenziyaların ləğvi bir sıra problemləri üzə çıxarıb. Bizdə keyfiyyətsiz xidmətlər təklif edən turizm şirkətləri yaranmağa başlayıb. Bunun qarşısını almaq üçün şirkətlər qarşısında müəyyən öhdəliklər irəli sürəcək bir mexanizm yaradılmalıdır. Bu cür şirkətlər ucbatından Azərbaycanın imici ziyan görə bilər. Bu səbəbdən şirkətlər qarşısında müəyyən meyarların təyin olunması vacibdir".
Azərbaycanda otellərin qiymət siyasətinin nizamlanması mexanizminin yaradılması təklifinə münasibət bildirən turizm sahəsi üzrə ekspert Bahadur Bilalov "Bakı-Xəbər"ə açıqlamasında bunları qeyd etdi: "Bazar iqtisadiyyatında hansısa tənzimlənmiş qiymətdən söhbət gedə bilməz. Tələb-təklif məsələsini nəzərə almaq lazımdır. Bakı şəhərində olan otellərin, demək olar ki, əksəriyyəti iyunun sonlarına qədər bronlaşdırılıb. Təbii ki, belə olan halda, otel rəhbərliyi qiyməti aşağı salmayacaq. Hər bir sahibkar çalışır ki, gəlir əldə etsin. Sahibkarlıq fəaliyyətinin əsasını işləyib pul qazanmaq təşkil edir. İstənilən xarici ölkədə belə bir qayda var. Bir elan olunmuş qiymət var, bir də turizm şirkətləri ilə razılaşdırılmış qiymətlər. Təəssüf ki, Azərbaycanda bu məsələ işlənmir".
Həmsöhbətimizin sözlərinə görə, Azərbaycan Turizm Assosiasiyası bu sahədə vahid bir qayda tətbiq etməlidir: "Ancaq elə olmalıdır ki, burada turoperatorlar, turizm şirkətləri və mehmanxanaların mövqeyi üst-üstə düşsün".
Günel CƏLİLOVA
