Aynur Əliyeva: "Xarici ölkələrdə uşağın peyvənd olunmamasını valideyn deyil, həkim müəyyən edir, ancaq bizdə isə..."
Körpə uşaqların gələcəkdə hər hansı xəstəliyə tutulmaması üçün onlar mütləq peyvənd olunmalıdır. Bu işdə valideynlərin rolu əsasdır. Onlar övladlarını peyvənd etdirmək üçün yaxınlıqdakı poliklinika və ya xəstəxanaya aparmalıdır. Ancaq bu gün bəzi valideynlər bu işə laqeyd yanaşır. Övladlarını peyvənd etdirməkdən yayınan xeyli valideyn var.
Səhiyyə Nazirliyinin Elmi-Tədqiqat Pediatriya İnstitutunun direktoru, respublikanın baş pediatrı Nəsib Quliyev media nümayəndələrinə açıqlamasında qeyd edib ki, bəzi ailələrdə uşaqların hüquqları valideynlər tərəfindən pozulur. Elə ailələr də var ki, uşaqlar özbaşına böyüyür. Valideynin savadı yoxdur, kiminsə sözü ilə uşağını peyvənd etdirmir: "2013-cü ilin aprelində Azərbaycan Prezidenti İlham Əliyevin sərəncamı ilə "Uşaqların icbari dispanserizasiyası haqqında" Qanun və Nazirlər Kabinetinin təsdiq etdiyi müvafiq təlimatda göstərilib ki, valideyn uşağını tibbi müayinə, peyvənd etdirməkdən imtina edərsə, ondan yazılı izahat alınmalıdır. Əgər uşaq peyvənd olunmursa, o həm özü, həm ətrafdakı uşaqları risq altında qoymuş olur.
Azərbaycanda hələ də uşaq əhalisinin 100 % kompleks tibbi müayinədən keçirilməsinə nail olunmayıb. 2015-ci ildə Azərbaycanda uşaq əhalisinin 92 %-i, 2016-cı ildə isə uşaq əhalisinin 90-91 %-i icbari dispanserizasiyadan keçib".
Pediatr Aynur Əliyeva qəzetimizə açıqlamasında qeyd etdi ki,
uşaqlar vaxtlı-vaxtında peyvənd olunmalıdır. Körpələrin peyvənd olunmasında məqsəd onların immunitetinin möhkəmləndirilməsidir.
Həmsöhbətimizin sözlərinə görə, uşaqların peyvənd olunması vacib məsələlərdən biridir: "Əksər xarici ölkələrdə uşağın peyvənd olunmamasını valideyn deyil, həkim müəyyən edir. Elə uşaq var ki, ona peyvənd pis təsir edir. Bunu həkim müəyyən edəndən sonra ona peyvənd vurulmasına icazə vermir, lakin onun immunitetini gücləndirən əlavə preparat təyin edir. Ancaq bizdə vəziyyət fərqlidir. Valideyn öz istəyi ilə uşağını peyvənd etdirmir. Səbəbini soruşanda isə buna inanmadığını və ya onun övladı bir neçə yaş böyüyəndə onu peyvənd etdirəcəyini deyir. Biz həmin valideynlərə başa sala bilmirik ki, hər peyvəndin özünün vurulma tarixi var, hansı peyvənd uşağa neçə aylığında və ya hansı yaş dövründə vurula bilər".
Günel CƏLİLOVA
