Könül Vaqifqızı: "Boşanmış qadınlar yenidən ailə həyatı qurmaq üçün məcbur əcnəbiyə ərə gedir"
Azərbaycanda ailə həyatı quran müasir gənclər daha əcnəbilərlə nikaha soyuq yanaşmır. Bunu son illər qeydə alınan faktlar da sübut edir. Rəqəmlərə nəzər yetirdikdə belə qənaətə gəlmək olur ki, gənclər beynəlmiləl ailə qurmaqdan 20-30 il öncəki kimi çəkinmir.
Həmçinin əcnəbi və vətəndaşlığı olmayanlarla nikaha girən azərbaycanlılar arasında qızlar oğlanlardan bir neçə dəfə çoxluq təşkil edir.
Statistik rəqəmlərə nəzər salsaq görərik ki, son illər azərbaycanlılarla əcnəbilər arasında bağlanan nikahların sayı xeyli artıb.
Qeyd edək ki, beynəlmiləl nikaha isti münasibət bəsləyən müasir azərbaycanlılar sevib-seçdiyi əcnəbi oğlanların dili, dini, irqinə fərq qoymayıb. Yəni, atalar demişkən, "könül sevən göyçək olar".
Azərbaycanlı xanımlar əcnəbilər arasında daha çox Türkiyə və İran vətəndaşları ilə ailə qurur. Xanımlarımızla ailə quran əcnəbi kişilər arasında Almaniya, Böyük Britaniya, Pakistan, Əfqanıstan, İsveç, Birləşmiş Ərəb Əmirlikləri, Hindistan, Səudiyyə Ərəbistanının vətəndaşları da var.
Azərbaycan xanımlarının əcnəbilərlə ailə qurması hallarının artmasını millət vəkilləri də təəssüf hissi ilə dilə gətirir.
Millət vəkili Məlahət İbrahimqızı Reproduktiv Sağlamlığa dair Milli Strategiyanın ilkin layihəsinin müzakirəsinə həsr olunmuş görüşdə qızların kütləvi olaraq xarici vətəndaşlarla ailə qurması haqqında danışıb.
Psixoloq Könül Vaqifqızı "Bakı-Xəbər"ə açıqlamasında qeyd etdi ki, qızların ailə qurmaq üçün əcnəbilərə meyl etməsi psixoloji aspektlərlə bağlıdır: "Məlumat üçün bildirim ki, Azərbaycan kişiləri Avropa qadınları ilə evlənməyi sevmir. Çünki əcnəbi qadınlarla bizim kişilərin arasında mentalitet fərqi var. Azərbaycanlı qadınlar xaricilərə ərə gedir. Çünki Avropa kişilərinin centlmen davranışları var. Azərbaycanda bəzi kişilər qadınla davrana bilmir. Qadına xəyanət etmək və s. məqamlar azərbaycanlı kişilərin problemidir. Qadınlarımız bilir ki, əcnəbi kişi qadına başqa qiymət verir. Lakin sonradan bunun belə olmadığını görən qadınlarımız problemlərlə üzləşir".
Həmsöhbətimizin fikrincə, qızların əcnəbilərə ərə getməsi səbəblərindən biri də güvənlə bağlıdır: "Bizdə isə qadına münasibət fərqlidir. Bu danılmaz faktdır. Boşanmış qadınlar yenidən ailə həyatı qurmaq üçün məcbur əcnəbiyə ərə gedir. Ancaq azərbaycanlı kişilər boşanmış qadınla ailə qurmaqdan yayınır. Bu cür mənfi düşüncələri insan beynindən silmək lazımdır".
Psixoloqun dediyinə görə, qızlar əsasən Türkiyə vətəndaşı ilə ailə qurmağa üstünlük verir: "O xanımlar arasında tanınmış simalar da var. Heç kim əcnəbilərlə izdivaca qadağa qoya bilməz, sevgi azaddır".
Günel CƏLİLOVA
