Ərşad Hüseynov: "Sərxoş vəziyyətdə nəqliyyat vasitəsini idarə etməklə bağlı problemi həll etmək üçün ilk növbədə ciddi maarifləndirməyə ehtiyac var"
Ötən il sərxoş sürücülər ucbatından 18 nəfər həyatını itirib. Bu barədə Dövlət Statistika Komitəsinin yaydığı məlumatda qeyd olunur. Bildirilir ki, nəqliyyat vasitələrinin sərxoş vəziyyətdə idarə olunması səbəbindən ölümlə və ya bədən xəsarəti alınması ilə nəticələnən 37 hadisə baş verib, nəticədə 18 nəfər ölüb, 34 nəfər isə yaralanıb. Belə hadisələrin 78,4 faizi minik avtomobillərinin sürücüləri tərəfindən törədilib.
Qeyd edək ki, sərxoş vəziyyətdə nəqliyyat vasitəsinin idarə olunmasına qarşı cəzalar nə qədər sərtləşdirilsə də, nəticə ürəkaçan deyil.
Yol təhlükəsizliyi məsələləri üzrə ekspert Ərşad Hüseynov "Bakı-Xəbər"ə açıqlamasında qeyd etdi ki, cəzaları sərtləşdirməklə hüquq pozuntusunun qarşısını almaq mümkün deyil: "Bəllidir ki, bir insanı qəsdən öldürən şəxs ömürlük azadlıqdan məhrum olunur. Azərbaycanda hər il təxminən onlarla şəxsi qəsdən öldürürlər. Sanksiya hər şey deyil. Problemdən çıxış yolu üçün digər tədbirlər görmək lazımdır".
Həmsöhbətimizin dediyinə görə, sərxoş vəziyyətdə nəqliyyat vasitəsini idarə etməklə bağlı problemi həll etmək üçün ilk növbədə ciddi maarifləndirməyə ehtiyac var: "Məsuliyyətin labüdlüyünü təmin edən işlər həyata keçirilməlidir. Təəssüf ki, bu sahədə çoxlu problem var. Orta statistik alkoqol həvəskarı olan sürücü bilir ki, on dəfə içib sükan arxasına keçsə, onu yalnız bir dəfə tuta bilərlər. Alkoqollu içki içmiş sürücü fikirləşir ki, avtomobili bu vəziyyətdə idarə etsə, ona heç kəs reaksiya verməyəcək. Sürücülərə alkoqolun nə cür təhlükələrə səbəb olacağını çatdırmaq lazımdır".
Ekspertin fikrincə, sərxoş sürücülərə qarşı güzəştsiz yanaşma tətbiq olunmalıdır: "Cəmiyyətimizdə belə bir yanaşma var ki, hər hansı problem həll olunmursa, istər maarifləndirmə, istərsə də digər tədbirlər bunun qarşısını almırsa və onun miqyası böyüyürsə, o zaman həmin problemi yaradanlara qarşı daha sərt cəzalar tətbiq edilməlidir. Hazırda sərxoş sürücülərlə bağlı olan məsələ də məhz həmin sosial problemlərdən biridir".
Günel CƏLİLOVA
