Əhməd Qəşəmoğlu: "... qadınların narkotiklərə aludə olmasına zəmin yaradır"
Əsrin bəlası olan narkomaniya problemi, bütün dünyada olduğu kimi, Azərbaycanda da mövcuddur. Son illər isə narkotik istifadəçilərinin sayı durmadan artır. Respublikamızda bununla bağlı görülən tədbirlərə baxmayaraq, problemin qarşısını almaq hələ də mümkün olmayıb.
Azərbaycanda rəsmi qeydiyyata alınan narkomanların arasında qadınların sayı artıb. Səhiyyə Nazirliyinin məlumatına əsasən, 2013-cü ildə ölkədəki bütün narkotik istifadəçilərinin 539-u, 2014-cü ildə 554-ü, 2015-ci ildə 592-si, 2016-cı ildə isə 612-si qadın olub. Ötən il yeni qeydiyyata alınan 2142 narkomanın 29-u qadın olub.
Ümumən narkomanlar arasında 25-45 yaşlı insanlar üstünlük təşkil etsə də, qadın narkomanlar arasında 30-45 yaşlılar daha çoxdur. Qadın narkomanların əksəriyyəti narkomaniyanın ən ağır forması olan inyeksion narkotik istifadəçisidir. Nazirlikdən o da bildirilib ki, qadınlarda narkotiklərdən psixi və fiziki asılılıq kişilərlə müqayisədə nisbətən tez formalaşır. Qadınlarda narkotiklərdən istifadəyə başladıqdan sonra asılılığın formalaşmasının orta müddəti 2 aydır. Qadınlar bioloji və psixoloji xüsusiyyətləri sayəsində narkotiklərə kişilərlə müqayisədə 10-15 dəfə tez sürətlə qurşanır.
Bütövlükdə, Azərbaycanda qadın narkomanların sayının artması nə ilə bağlıdır? Ekspertlər bunun səbəbini nə ilə əlaqələndirir? Sözügedən məsələ ilə bağlı fikirlərini "Bakı-Xəbər"lə bölüşən sosioloq Əhməd Qəşəmoğlu bunu bəzi amillərlə əlaqələndirdi: "Səbəblər müxtəlifdir. Səbəblərdən biri onunla bağlıdır ki, sosial şəbəkələrdə, internetdə yüngül həyat tərzi ilə bağlı məlumatlar çoxalıb. Təəssüf ki, ətrafımızda bununla bağlı həm şərait yaranır, həm də bu barədə geniş məlumatlar çoxalır. Bu da, öz növbəsində, qadınların narkotiklərə aludə olmasına zəmin yaradır. Digər tərəfdən, bu gün cəmiyyətdə qadınlar açıq şəkildə siqaret çəkirsə, məktəbli qızlar da buna meyl göstərir. Başqa bir tərəfdən, kənd qızları evdən məktəb adı ilə çıxıb Bakıya görüşə gəlirsə, oğlanların narkotik qəbul etməsindən təəccüblənmək olmaz. Bu təkcə təhsilin deyil, cəmiyyətin bəlasıdır. Bunun qarşısını almaq üçün ilk növbədə orta məktəblərdə, cəmiyyətdə geniş kampaniya aparılmalıdır. Narkomanların sonu onlara əyani şəkildə göstərilməlidir. "Ağ ölüm"ün bu vaxta qədər heç kəsə xoşbəxtlik gətirmədiyini şagirdlərə izah etmək lazımdır. Qadınların narkomaniyaya meyllənməsi çox təhlükəli tendensiyadır". Vidadi ORDAHALLI
