Kamran Əliyev: "Nəqliyyat vasitəsinin konstruksiyasında təhlükəsizlik kəməri varsa, həmin şəxs o kəmərdən istifadə etməlidir"
Ərşad Hüseynov: "Qanunvericilikdə, ön və arxa oturacaqda oturmasına baxmayaraq, bütün sərnişinlərin təhlükəsizlik kəmərlərindən istifadəsi əsas şərt kimi qoyulub"
Təhlükəsizlik kəmərini taxmayan tək avtomobili idarə edən şəxslər deyil, eyni zamanda, arxa oturacaqda oturub kəmər istifadə etməyənlər cərimələnəcək. Arxa oturacaqda əyləşən şəxslərin kəmər taxması məsələsi qanunvericilikdə də qeyd olunur. Buna səbəb qəza halları zamanı ölümlərin qarşısını almaqdır.
Arxa oturacaqda əyləşən sərnişinlərin təhlükəsizlik kəməri taxmasının vacibliyi barədə fikir bildirən Baş Dövlət Yol Polisi İdarəsinin İctimaiyyətlə əlaqələr şöbəsinin rəisi Kamran Əliyev qeyd etdi ki, bu məsələ qanunla tənzimlənir: "Fərqi yoxdur, avtomobilin ön və ya arxa oturacağında əyləşsin, əgər nəqliyyat vasitəsinin konstruksiyasında təhlükəsizlik kəməri varsa, həmin şəxs o kəmərdən istifadə etməlidir. Sürücünün öz məsuliyyəti var, sərnişinin də kəmər bağlamadan getdiyinə görə öz məsuliyyəti var. Bu məsələ ilə bağlı heç bir yenilik yoxdur. Sadəcə, bütün təhlillər göstərir ki, qəzalarda ən çox zərər çəkənlər - xəsarət alanlar və ya ölənlər sərnişinlər olur. Əksər hallarda yol qəzasında avtomobilin arxa tərəfinin o qədər də əzilmədiyini görürsən, amma oradakı sərnişin həyatını itirir. Niyə? Çünki zərbə zamanı arxada əyləşmiş insan önə çırpılır. Ön tərəfdə əyləşmiş sərnişin kəmər taxmayıbsa, daha pis nəticələnir".
K.Əliyev bildirib ki, sərnişinlərin kəmər taxmamasına görə əvvəllər cərimələnməməsi müəyyən qədər mentalitetlə bağlı olub: "Bir çox hallarda avtomobildə insanlar ailəvi hərəkət edəndə onlara xəbərdarlıq edilirdi. Bu barədə dəfələrlə süjetlər hazırlamışıq, müraciətlər etmişik. Yəni görürsünüz avtomobildə təhlükəsizlik kəməri var, bağlayın. Onun məsuliyyətini sürücü yalnız o halda daşıyır ki, avtomobildə təhlükəsizlik kəməri olsa da, sürücü onu çıxarsın. Bu halda, sərnişini məsuliyyətə cəlb etmək olmaz. Çünki onun təqsiri deyil ki, yerindəki təhlükəsizlik kəmərini sürücü kəsib çıxarıb. Konstruksiyaya dəyişiklik edilməsinə, yəni təhlükəsizlik kəmərinin çıxarılmasına görə sürücü cərimə edilir və bu hallarda 150 manat miqdarında cərimə kəsilir. Lakin təhlükəsizlik kəməri varsa və sərnişin bu kəmərdən istifadə etmirsə, bunun məsuliyyətini sərnişin daşıyır. İnzibati Xətalar Məcəlləsinin 338.3-cü maddəsinə əsasən, həmin sərnişinlər 30 manat cərimə edilir".
Nəqliyyat sahəsi üzrə ekspert Ərşad Hüseynov isə qeyd etdi ki, qanunvericilikdə, ön və arxa oturacaqda oturmasına baxmayaraq, bütün sərnişinlərin təhlükəsizlik kəmərlərindən istifadəsi əsas şərt kimi qoyulub: "Tək minik avtomobillərində deyil, yük avtomobilində də, şəhərlərarası avtobuslarda da, mikroavtobuslarda da bütün sərnişinlər kəmər bağlamalıdır. Şəhər daxilində ayaq üstə sərnişin daşımağa icazə verilən avtobuslar istisna olmaqla, qalan digər nəqliyyat vasitələrində kəmər bağlanmalıdır. Artıq dünyada heç kim kəmər olmayan avtomobil istehsal etmir. 780 ton götürən yük avtomobilinin də həm sürücüsünün, həm də sərnişininin kəməri var. Ölkələrarası fəaliyyət göstərən, Bakıdan İstanbula, Tiflisə gedən avtobuslarda da bütün sərnişinlərin təhlükəsizlik kəməri olmalıdır və hərəkət vaxtı bağlanmalıdır. Minik avtomobillərinin bütün sərnişinlərinin kəməri olmalıdır və bağlanmalıdır".
Günel CƏLİLOVA
