Maarif Hüseynov: "Prezidentin bu sərəncamından sonra Qarabağ atı Azərbaycan bayrağını daha da zirvələrə qaldıracaq"
Məlum olduğu kimi, Prezident İlham Əliyev Azərbaycan Respublikasında Qarabağ atı cinsinin inkişafına əlavə dəstək haqqında sərəncam imzalayıb. Sərəncamda Qarabağ atı cinsinin damazlıq özəyinin qorunması və inkişaf etdirilməsi istiqamətində həyata keçirilən tədbirlərin başa çatdırılması məqsədilə aidiyyəti qurumlar qarşısında tapşırıqlar qoyulub.
Bu sahədə seleksiya-damazlıq işlərinin elmi əsaslarla aparılmasına şərait yaradılması istiqamətində həyata keçirilən tədbirlərin başa çatdırılması və Azərbaycan Respublikası Kənd Təsərrüfatı Nazirliyinin Heyvandarlıq Elmi-Tədqiqat İnstitutunun tabeliyindəki "Ağdam Atçılıq Təsərrüfatı" Məhdud Məsuliyyətli Cəmiyyətinin Atçılıq kompleksinin tikintisi üçün Azərbaycan Respublikasının 2017-ci il dövlət büdcəsində nəzərdə tutulan Azərbaycan Respublikası Prezidentinin ehtiyat fondundan Azərbaycan Respublikasının Kənd Təsərrüfatı Nazirliyinə 2 (iki) milyon manat ayrılıb.
Ağdam Atçılıq Zavodunun direktoru Maarif Hüseynov "Bakı-Xəbər"ə açıqlamasında qeyd etdi ki, Qarabağ atı cinsinin inkişafı üçün Prezidentin diqqəti müsbət dəyərləndirilməlidir: "Ağdam Atçılıq Zavodunun bütün heyəti, qarabağlılar, ümumiyyətlə, atsevərlər ölkə başçısına dərin təşəkkürünü bildirir. Demək olar ki, Qarabağ atının nəsli kəsilmək üzrə idi. 2014-cü ildə ölkə başçısı Qarabağ atının damazlıq keyfiyyətinin yaxşılaşdırılması ilə bağlı sərəncam vermişdi. O vaxtdan bu günə kimi Qarabağ atı cinsinin inkişaf etdirilməsi ilə bağlı bir neçə dəfə sərəncam verib. Biz də bu sərəncamlardan irəli gələrək Qarabağ atını qorumağa çalışırıq".
Həmsöhbətimizin sözlərinə görə, Qarabağ atının dünyaya tanıdılmasında ölkənin birinci xanımı Mehriban Əliyevanın rolu danılmazdır: "O, Fransada Qarabağ atı haqqında kitab yazdırıb və həmin ölkədə o kitabın təntənəli şəkildə təqdimatı keçirilib. Daha sonra həmin kitab ingilis və alman dillərinə tərcümə olunaraq əksər ölkələrdə yayıldı".
M.Hüseynov bildirdi ki, Qarabağ atı hər zaman Azərbaycan bayrağını xarici ölkələr arasında zirvəyə qaldırıb. Prezidentin bu sərəncamından sonra Qarabağ atı Azərbaycan bayrağını daha da zirvələrə qaldıracaq".
Günel CƏLİLOVA
