"Valideyn himayəsindən məhrum olan uşaqlar var ki, onlar əksər hallarda narkotikdən istifadənin birinci mərhələsinə başlayır"
Yeniyetmələrin narkomaniya xəstəliyinə qurşanması hazırkı dövrün aktual məsələsidir. Ona görə ki, narkotiklərdən ilk istifadə əksər hallarda məhz bu yaş dövründə baş verir.
Açıqlanan statistik rəqəmlərə əsasən, Azərbaycanda narkomanların sayı artıb. Hətta onların arasında 5 uşaq da var. Səhiyyə Nazirliyinin məlumatına əsasən, 2010-cu ildə Azərbaycanda narkotik istifadəçilərinin sayı 25 489, 2011-ci ildə 26 716, 2012-ci ildə 27 910, 2013-cü ildə 28 376, 2014-cü ildə 28 656, 2015-ci ildə 28 555, 2016-cı ildə isə 29 448 nəfər olub.
Yalnız 2016-cı ildə 2142 nəfər ilk dəfə narkotik istifadəçisi kimi qeydiyyata götürülüb. 2015-ci ildə isə ilk dəfə narkotik istifadəçisi kimi qeydiyyata alınan narkomanların sayı 2017 nəfər olub.
Ümumilikdə, narkotik istifadəçiləri arasında 25-45 yaşarası insanlar üstünlük təşkil edir.
Son məlumatlara əsasən, Azərbaycanda 15-17 yaşlı 5, 18-24 yaşlı 1447, 25-29 yaşlı 4076, 30-34 yaşlı 4239, 35-39 yaşlı 4542, 40-44 yaşlı 3670, 45-49 yaşlı 3313, 50-54 yaşlı 2818, 55-59 yaşlı 2266, 60-64 yaşlı 1931, 65 yaşdan yuxarı isə 1142 nəfər narkotik istifadəçisi var.
Narkotik istifadəçiləri arasında uşaqların qeydə alınması narahatlıq doğurur. Mövzu ilə bağlı ekspertə müraciət etdik.
Uşaq Hüquqları Müdafiə Liqasının sədri Yusif Bəkirov bizimlə söhbətində bildirdi ki, narkomaniya problemi əksər ölkələr üçün aktualdır və narkomanların arasında uşaq və yeniyetmələrin olması faktdır: "Bu problem mövcuddur və narkomaniyanın zəif formasıdır. Ona görə də onları narkoman adlandırmaq olmaz. Lakin küçələrdə yaşayan, valideyn himayəsindən məhrum olan uşaqlar var ki, onlar əksər hallarda narkotikdən istifadənin birinci mərhələsinə başlayır və gələcəkdə narkoman kimi yetişirlər. Bunu, əlbəttə ki, inkar etmək olmaz. Eyni zamanda, belə uşaqların statistikasını da aparmaq mümkün deyil. Çünki narkomanlar əsasən dispanserdə qeydiyyatda olur. Həmin uşaqlar isə orada qeydiyyatda deyil. Həmçinin Cinayət Məcəlləsində bu barədə dəqiq bir şey olmadığı üçün, onları cinayət məsuliyyətinə cəlb etmək də mümkün deyil. Küçədə yaşayan uşaqlar isə narkomaniyanın bütün mərhələlərini öz üzərində sınaqdan keçirir. Bu problemin həlli üçün profilaktik tədbirlər görülməlidir".
Günel CƏLİLOVA
